യുഎഇ : അമേരിക്കയുടെ 250-ാമത് സ്വാതന്ത്ര്യദിനാഘോഷങ്ങളുടെ ഭാഗമായി ന്യൂയോർക്കിൽ നടന്ന വ്യോമാഭ്യാസ പ്രകടനത്തിൽ ചരിത്രപ്രസിദ്ധമായ പങ്കാളിത്തവുമായി യുഎഇയുടെ ദേശീയ എയറോബാറ്റിക് ടീമായ ‘അൽ ഫുർസാൻ’. തങ്ങളുടെ ചരിത്രത്തിലാദ്യമായാണ് അൽ ഫുർസാൻ സംഘം അമേരിക്കൻ ആകാശത്ത് വിസ്മയമൊരുക്കുന്നത്. യുഎസ് നാവികസേനയുടെ ‘ബ്ലൂ എഞ്ചൽസ്’, യുഎസ് എയർഫോഴ്സ് വിമാനങ്ങൾ എന്നിവയ്ക്കൊപ്പം അണിനിരന്ന യുഎഇ സംഘം ഇരുരാജ്യങ്ങളും തമ്മിലുള്ള ശക്തമായ നയതന്ത്ര സൗഹൃദത്തിന്റെ പ്രതീകമായാണ് ഈ പ്രകടനം കാഴ്ചവെച്ചത്.
ന്യൂയോർക്ക് ഹാർബറിലും സ്റ്റാച്യൂ ഓഫ് ലിബേർട്ടിക്ക് മുകളിലും യുഎഇ പതാകയുടെ നിറങ്ങളിൽ പുകപടലങ്ങൾ തീർത്ത് നടത്തിയ പ്രകടനം അവിടെ തടിച്ചുകൂടിയ ജനങ്ങളെയും അന്താരാഷ്ട്ര മാധ്യമങ്ങളെയും ഏറെ ആകർഷിച്ചു. അമേരിക്കൻ സ്വാതന്ത്ര്യദിനത്തോടുള്ള ആദരസൂചകമായി ചുവപ്പ്, വെള്ള, നീല നിറങ്ങളിലുള്ള പുകപടലങ്ങളും അവർ വായുവിൽ വിതറി. അൽ ഫുർസാൻ പൈലറ്റുമാരുടെ അതീവ കൃത്യതയോടെയുള്ള പറക്കൽ മികവിനെയും കഠിനമായ അച്ചടക്കത്തെയും അമേരിക്കൻ മാധ്യമങ്ങൾ തത്സമയ സംപ്രേക്ഷണത്തിനിടെ വൻതോതിൽ പ്രശംസിക്കുകയും ചെയ്തു.