ദുബായ് : സൗരപ്രവർത്തനങ്ങൾ ശക്തമായതിനെ തുടർന്ന് ഭൂമിയേക്കാൾ പത്ത് മടങ്ങ് വലിപ്പമുള്ള രണ്ട് ഭീമൻ സൗരകളങ്കങ്ങൾ (Sunspots) യുഎഇ ആകാശത്ത് ദൃശ്യമായി. വെള്ളിയാഴ്ച രാവിലെയാണ് ‘4478’, ‘4479’ എന്ന് പേരിട്ടിരിക്കുന്ന ഈ സൗരകളങ്കങ്ങൾ എമിറേറ്റ്സ് അസ്ട്രോണമി സൊസൈറ്റി അംഗമായ തമീം അൽ തമീമി ക്യാമറയിൽ പകർത്തിയത്. ഇവയിൽ നിന്നുണ്ടായ ശക്തമായ സൗരജ്വാലകൾ അന്തരീക്ഷത്തിന്റെ മുകൾത്തട്ടിൽ അയോണീകരണത്തിന് കാരണമായതായി സൊസൈറ്റി ചെയർമാൻ ഇബ്രാഹിം അൽ ജർവാൻ വ്യക്തമാക്കി.
സൂര്യന്റെ ശക്തമായ കാന്തികവലയ വ്യതിയാനങ്ങൾ കാരണമാണ് ഇത്തരം കറുത്ത പാടുകൾ രൂപപ്പെടുന്നത്. വരും ദിവസങ്ങളിൽ സൂര്യോദയ സമയത്തോ സൂര്യാസ്തമയ സമയത്തോ ജനങ്ങൾക്ക് ഇവ കാണാൻ സാധിച്ചേക്കും. എന്നാൽ, യാതൊരുവിധ സുരക്ഷാ മാനദണ്ഡങ്ങളും ഇല്ലാതെ സൂര്യനെ നേരിട്ട് നോക്കരുതെന്നും അത് കാഴ്ചശക്തിയെ ബാധിക്കുമെന്നും ജ്യോതിശാസ്ത്രജ്ഞർ മുന്നറിയിപ്പ് നൽകുന്നു. പ്രത്യേക സോളാർ ഫിൽട്ടറുകളോ പ്രൊജക്ഷൻ രീതികളോ ഉപയോഗിച്ച് മാത്രമേ ഇത് നിരീക്ഷിക്കാവൂ.