54
ഷാർജ : സോഷ്യൽ മീഡിയ വഴി വ്യാജ പരസ്യം നൽകി അപാർട്ട്മെന്റ് വാടകയ്ക്ക് നൽകാനുണ്ടെന്ന് വിശ്വസിപ്പിച്ച് പണം തട്ടിയ കേസിൽ മൂന്ന് പേർക്ക് ഒരു വർഷം തടവും നാടുകടത്തലും ശിക്ഷ വിധിച്ച് ഷാർജ അപ്പീൽ കോടതി. ഉടമസ്ഥാവകാശമില്ലാത്ത കെട്ടിടം കാണിച്ചുനൽകി വാടക കരാറിലെത്തിയ പ്രതികൾ ഇരയിൽ നിന്ന് മുൻകൂറായി തുക കൈപ്പറ്റുകയായിരുന്നു.
തുടർന്ന് നൽകിയ വാടക കരാർ വ്യാജമാണെന്ന് ഔദ്യോഗിക പരിശോധനയിൽ വ്യക്തമായതോടെയാണ് തട്ടിപ്പിനിരയായ വ്യക്തി പോലീസിൽ പരാതി നൽകിയത്. നേരത്തെ ഷാർജ മിസ്ഡമീനർ കോടതി പ്രതികൾക്ക് മൂന്ന് മാസം തടവാണ് വിധിച്ചിരുന്നത്. എന്നാൽ ശിക്ഷ പോരെന്ന പബ്ലിക് പ്രോസിക്യൂഷന്റെ അപ്പീൽ പരിഗണിച്ചാണ് അപ്പീൽ കോടതി തടവുശിക്ഷ ഒരു വർഷമായി ഉയർത്തിയത്. പ്രതികളിൽ നിന്ന് പിടിച്ചെടുത്ത വസ്തുക്കൾ കണ്ടുകെട്ടാനും കോടതി ഉത്തരവിട്ടു.