ഷാർജ : ബലിപെരുന്നാൾ (ഈദ് അൽ അദ്ഹ) അവധിക്കാലത്ത് ജനങ്ങളുടെ സുരക്ഷയും സുഗമമായ ഗതാഗതവും ഉറപ്പാക്കാൻ ഷാർജ പോലീസ് വിജയകരമായി നടപ്പിലാക്കിയ സുരക്ഷാ പദ്ധതികളുടെ വിവരങ്ങൾ പുറത്തുവിട്ടു. പെരുന്നാൾ ദിവസങ്ങളിൽ മാത്രം 70,000-ത്തിലധികം ഫോൺ കോളുകളാണ് ഷാർജ പോലീസ് കൺട്രോൾ റൂമിൽ കൈകാര്യം ചെയ്തത്.
അടിയന്തിര സഹായങ്ങൾക്കായുള്ള ‘999’ എന്ന ഹോട്ട്ലൈൻ നമ്പറിലൂടെ 61,509 കോളുകളും, അടിയന്തിരമല്ലാത്ത പൊതുവായ ആവശ്യങ്ങൾക്കും അന്വേഷണങ്ങൾക്കുമായി ‘901’ എന്ന നമ്പറിലൂടെ 8,432 കോളുകളുമാണ് പോലീസിന് ലഭിച്ചത്. അവധിക്കാലത്ത് പോലീസിന്റെ പ്രവർത്തനസജ്ജതയും ഏത് സമയത്തും ജനങ്ങളെ സഹായിക്കാനുള്ള സന്നദ്ധതയുമാണ് ഇതിലൂടെ വ്യക്തമാകുന്നതെന്ന് ജനറൽ ഡിപ്പാർട്ട്മെന്റ് ഓഫ് ഓപ്പറേഷൻസ് ആൻഡ് സെക്യൂരിറ്റി സപ്പോർട്ട് ഡയറക്ടർ ജനറൽ ബ്രിഗേഡിയർ ഒമർ അൽ ഗസാൽ പറഞ്ഞു.
പെരുന്നാൾ പ്രമാണിച്ച് ജനങ്ങൾ കൂടുതൽ ഒത്തുകൂടാൻ സാധ്യതയുള്ള പള്ളികൾ, ഷോപ്പിംഗ് മാളുകൾ, വിനോദസഞ്ചാര കേന്ദ്രങ്ങൾ എന്നിവിടങ്ങളിലെല്ലാം മുൻകൂട്ടിയുള്ള പഠനങ്ങളുടെ അടിസ്ഥാനത്തിൽ വലിയ രീതിയിലുള്ള സുരക്ഷാ-ട്രാഫിക് ക്രമീകരണങ്ങൾ പോലീസ് ഒരുക്കിയിരുന്നു. ഫീൽഡ് ടീമുകളും വിദഗ്ദ്ധ സംഘങ്ങളും 24 മണിക്കൂറും സജീവമായി രംഗത്തുണ്ടായിരുന്നതിനാൽ അപകടങ്ങളോ മറ്റ് സുരക്ഷാ പ്രശ്നങ്ങളോ ഉണ്ടാകാതെ ഗതാഗതം സുഗമമാക്കാൻ സാധിച്ചു. അവധിക്കാലത്ത് സുരക്ഷാ നിർദ്ദേശങ്ങൾ കർശനമായി പാലിക്കുകയും പോലീസിനോട് പൂർണ്ണമായി സഹകരിക്കുകയും ചെയ്ത പൊതുജനങ്ങൾക്ക് ഷാർജ പോലീസ് പ്രത്യേക നന്ദി അറിയിച്ചു. അടിയന്തിര സാഹചര്യങ്ങളിൽ 999 എന്ന നമ്പറിലും, മറ്റ് സേവനങ്ങൾക്കായി 901 എന്ന നമ്പറിലും എപ്പോഴും ബന്ധപ്പെടാമെന്ന് പോലീസ് ഒരിക്കൽക്കൂടി ഓർമ്മിപ്പിച്ചു.