മുഹമ്മദ് ബിൻ റാഷിദ് ലീഡർഷിപ്പ് മെഡലിന്റെ ആദ്യ ജേതാവിന് ഷെയ്ഖ് ഹംദാൻ അംഗീകാരം നൽകി

ദുബായ് : ദുബായ് ഭരണകൂടത്തിലെ ഏറ്റവും ഉയർന്ന പുരസ്കാരങ്ങളിലൊന്നായ ‘മുഹമ്മദ് ബിൻ റാഷിദ് ലീഡർഷിപ്പ് മെഡലിന്റെ’ (Mohammed bin Rashid Leadership Medal) പ്രഥമ ജേതാവിന് ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അംഗീകാരം നൽകി. അവാർഡ് സൂപ്പർവൈസറി കമ്മിറ്റി യോഗത്തിൽ അധ്യക്ഷത വഹിച്ച ശേഷമാണ് ഡയറക്ടർ ജനറൽ പദവിയിലുള്ള ആദ്യ ജേതാവിനെ അദ്ദേഹം തിരഞ്ഞെടുത്തത്. സെപ്റ്റംബർ 23-ന് നടക്കുന്ന മുഹമ്മദ് ബിൻ റാഷിദ് ലീഡർഷിപ്പ് ഫോറം 2026-ൽ വിജയിയെ ഔദ്യോഗികമായി പ്രഖ്യാപിക്കുകയും ആദരിക്കുകയും ചെയ്യും.
രണ്ടാം നിര, മൂന്നാം നിര നേതൃത്വങ്ങളെ വളർത്തിയെടുക്കുന്നതിലും ശാക്തീകരിക്കുന്നതിലും മികച്ച പ്രവർത്തനം കാഴ്ചവെക്കുന്ന ഡയറക്ടർ ജനറൽമാർക്കാണ് ഈ വാർഷിക പുരസ്കാരം നൽകുന്നത്. സ്ഥാപനങ്ങളുടെ സുസ്ഥിരമായ വളർച്ചയ്ക്ക് ഭാവി നേതാക്കളെ സജ്ജമാക്കുകയാണ് ഇതിലൂടെ ലക്ഷ്യമിടുന്നത്. 32 സർക്കാർ സ്ഥാപനങ്ങളിലെ ഡയറക്ടർ ജനറൽമാരെയും രണ്ടാം നിര നേതാക്കളെയും ഉൾപ്പെടുത്തി 100-ലധികം അഭിമുഖങ്ങളിലൂടെയും അന്താരാഷ്ട്ര വിദഗ്ധരുടെ മേൽനോട്ടത്തിലൂടെയുമാണ് പ്രഥമ പതിപ്പിലെ വിജയിയെ തിരഞ്ഞെടുത്തത്.