ദുബായ് : ലോകത്തിലെ ഏറ്റവും സുരക്ഷിതമായ നഗരങ്ങളിലൊന്നായി ദുബായെ മാറ്റിയെടുക്കുന്നതിൽ നിർണായക പങ്കുവഹിച്ച ദുബായ് പൊലീസ് തങ്ങളുടെ സ്ഥാപനത്തിന്റെ എഴുപതാം വാർഷികം ആഘോഷിക്കുന്നു. 1956-ൽ പരിമിതമായ സൗകര്യങ്ങളോടെ പ്രവർത്തനം ആരംഭിച്ച സുരക്ഷാ വിഭാഗത്തിൽ നിന്നും ഇന്ന് ആധുനിക സാങ്കേതികവിദ്യകളും സ്മാർട്ട് സംവിധാനങ്ങളും സമന്വയിപ്പിച്ച ആഗോള സുരക്ഷാ മാതൃകയിലേക്കുള്ള ദുബായ് പൊലീസിന്റെ വളർച്ച സമാനതകളില്ലാത്തതാണെന്ന് കമാൻഡർ ഇൻ ചീഫ് ലഫ്റ്റനന്റ് ജനറൽ അബ്ദുള്ള ഖലീഫ അൽ മർറി വ്യക്തമാക്കി. ദുബായുടെ വികസനത്തിനും സമൃദ്ധിക്കും അടിത്തറയിട്ടത് ഏഴ് പതിറ്റാണ്ടുകൾക്ക് മുൻപ് രൂപം നൽകിയ ഈ സുരക്ഷിത ശൃംഖലയാണെന്ന്
വാർഷികത്തോടനുബന്ധിച്ച് സംസാരിക്കവേ അദ്ദേഹം ഓർമ്മിപ്പിച്ചു. പ്രവചനാതീതമായ പ്രതിസന്ധികളെയും ആഗോള മാറ്റങ്ങളെയും കൃത്യമായ ആസൂത്രണത്തിലൂടെയും അത്യാധുനിക സാങ്കേതിക വിദ്യകളിലൂടെയും മറികടക്കാൻ സേനയ്ക്ക് സാധിച്ചിട്ടുണ്ട്. മുൻകാല ഉദ്യോഗസ്ഥരുടെ ദീർഘവീക്ഷണവും കഠിനാധ്വാനവും യുഎഇ ഭരണാധികാരികളുടെ നിരന്തരമായ പിന്തുണയുമാണ് ദുബായ് പൊലീസിനെ ലോകത്തിലെ ഏറ്റവും മികച്ച സുരക്ഷാ സേനകളിലൊന്നാക്കി മാറ്റിയതെന്നും അദ്ദേഹം കൂട്ടിച്ചേർത്തു.