ദുബായ് : ഇൻവെസ്റ്റ്‌മെന്റ് കോർപ്പറേഷൻ ഓഫ് ദുബായിൽ (ICD) നിന്ന് 22.27 ശതമാനം ഓഹരികൾ ഏറ്റെടുത്തതോടെ ഇമാർ പ്രോപ്പർട്ടീസിന്റെ ഏറ്റവും വലിയ ഓഹരിയുടമയായി ദുബായ് ഹോൾഡിംഗ് മാറി. ചൊവ്വാഴ്ചയാണ് കമ്പനികൾ ഇതുസംബന്ധിച്ച ഔദ്യോഗിക പ്രഖ്യാപനം നടത്തിയത്.
പുതിയ കരാറോടെ ദുബായ് ഷെയർ മാർക്കറ്റിൽ ലിസ്റ്റ് ചെയ്തിട്ടുള്ള ഇമാർ പ്രോപ്പർട്ടീസിൽ ദുബായ് ഹോൾഡിംഗിനുള്ള ആകെ ഓഹരി പങ്കാളിത്തം 29.73 ശതമാനമായി ഉയർന്നു. ഇതോടെ കമ്പനിയുടെ ഏറ്റവും വലിയ ഓഹരിയുടമ എന്ന സ്ഥാനവും ദുബായ് ഹോൾഡിംഗ് ഉറപ്പിച്ചു. ഇടപാടിന്റെ സാമ്പത്തിക വിശദാംശങ്ങൾ വെളിപ്പെടുത്തിയിട്ടില്ലെങ്കിലും, ഇതൊരു തന്ത്രപ്രധാനമായ നീക്കമാണെന്ന് ഉദ്യോഗസ്ഥർ വിലയിരുത്തി.
ഇമാറിന്റെ ആസ്തികളുടെ ഗുണമേന്മയിലുള്ള വിശ്വാസവും ദുബായിലെ റിയൽ എസ്റ്റേറ്റ് മേഖലയുടെ കരുത്തുമാണ് ഈ ഓഹരി കൈമാറ്റത്തിലൂടെ പ്രതിഫലിക്കുന്നത്. ദുബായുടെ സാമ്പത്തിക അടിത്തറയിലുള്ള ഉറച്ച വിശ്വാസമാണ് ഈ നീക്കത്തിന് പിന്നിലെന്ന് അധികൃതർ വ്യക്തമാക്കി. ഇമാർ പ്രോപ്പർട്ടീസിന്റെ ഭാവി പ്രവർത്തനങ്ങളിൽ ഈ മാറ്റം നിർണ്ണായകമാകും.