ദുബായ് : യുഎഇയിൽ ഈ ആഴ്ച അന്തരീക്ഷ ഈർപ്പം വർധിക്കാനും പൊടിക്കാറ്റിനും കടൽക്ഷോഭത്തിനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. വടക്ക്-പടിഞ്ഞാറൻ, തെക്ക്-പടിഞ്ഞാറൻ ദിശകളിൽ നിന്നുള്ള കാറ്റ് ശക്തമാകുന്നതാണ് കാലാവസ്ഥാ മാറ്റത്തിന് കാരണം.
വരും ദിവസങ്ങളിൽ രാജ്യം പൊതുവെ തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥയിലായിരിക്കും. എന്നാൽ രാത്രികാലങ്ങളിലും ബുധനാഴ്ച പുലർച്ചെയും തീരപ്രദേശങ്ങളിൽ ഈർപ്പം കൂടാനും നേരിയ മഞ്ഞുണ്ടാകാനും സാധ്യതയുണ്ട്. തീരപ്രദേശങ്ങളിലും ഉൾനാടൻ മേഖലകളിലും താപനില 38 ഡിഗ്രി സെൽഷ്യസിനും 42 ഡിഗ്രി സെൽഷ്യസിനും ഇടയിലായിരിക്കും. വ്യാഴം, വെള്ളി ദിവസങ്ങളിൽ കാറ്റിന്റെ വേഗത മണിക്കൂറിൽ 40 കിലോമീറ്റർ വരെ ഉയരാൻ സാധ്യതയുള്ളതിനാൽ, പ്രത്യേകിച്ച് വടക്കൻ-കിഴക്കൻ മേഖലകളിൽ പൊടിക്കാറ്റ് അനുഭവപ്പെടും.
കടൽ പ്രക്ഷുബ്ധമാകാൻ സാധ്യതയുള്ളതിനാൽ ജാഗ്രത പാലിക്കണമെന്നും കാലാവസ്ഥാ കേന്ദ്രം നിർദ്ദേശിച്ചു. അറേബ്യൻ ഗൾഫിൽ വ്യാഴാഴ്ച മുതൽ വെള്ളിയാഴ്ച വരെ കടൽ ഇടയ്ക്കിടെ പ്രക്ഷുബ്ധമായേക്കാം. ഒമാൻ കടലിലും സമാനമായ രീതിയിൽ തിരമാലകൾ ഉയരാൻ സാധ്യതയുണ്ട്. എന്നാൽ ശനിയാഴ്ചയോടെ കാറ്റിന്റെ വേഗത കുറയുകയും കടൽ ശാന്തമാകുകയും ചെയ്യുമെന്നാണ് പ്രതീക്ഷിക്കുന്നത്. പൊതുജനങ്ങൾ കാലാവസ്ഥാ മാറ്റങ്ങൾ ശ്രദ്ധിക്കണമെന്നും യാത്രകളിൽ സുരക്ഷ ഉറപ്പാക്കണമെന്നും അധികൃതർ ഓർമ്മിപ്പിച്ചു.