ദുബായ് : ലണ്ടൻ, പാരീസ്, ബാഴ്‌സലോണ തുടങ്ങിയ പ്രമുഖ നഗരങ്ങളെ പിന്തള്ളിക്കൊണ്ട് 2026 ലെ ലോകത്തിലെ ഏറ്റവും ‘ഇൻസ്റ്റാഗ്രാമബിൾ’ (സോഷ്യൽ മീഡിയയിൽ പങ്കുവെക്കാൻ ആളുകൾ ഏറ്റവും കൂടുതൽ ഇഷ്ടപ്പെടുന്ന) നഗരമെന്ന ബഹുമതി ദുബായ് സ്വന്തമാക്കി. 100 ൽ 100 ഇൻസ്റ്റാഗ്രാമബിലിറ്റി സ്‌കോർ നേടിയാണ് ദുബായ് ഈ നേട്ടം കൈവരിച്ചത്. ഇൻസ്റ്റാഗ്രാം, ടിക്ടോക് എന്നീ പ്ലാറ്റ്‌ഫോമുകളിലായി ദുബായെക്കുറിച്ച് 190.2 ദശലക്ഷം (19.02 കോടി) പോസ്റ്റുകളാണ് വന്നിട്ടുള്ളത്. കൂടാതെ ലോകമെമ്പാടുനിന്നുമായി 3.43 ദശലക്ഷം (34.3 ലക്ഷം) ആളുകൾ ഈ നഗരത്തെക്കുറിച്ച് ഇൻ്റർനെറ്റിൽ തിരയുകയും ചെയ്തു.
നഗരങ്ങൾക്ക് പുറമെ ലോകത്തിലെ ഏറ്റവും ഇൻസ്റ്റാഗ്രാമബിൾ ലാൻഡ്‌മാർക്കായി (പ്രസിദ്ധമായ സ്ഥലം) തെരഞ്ഞെടുക്കപ്പെട്ടത് ദുബായിലെ ബുർജ് ഖലീഫയാണ്. ഈ പട്ടികയിൽ 100 ൽ 100 ഇൻസ്റ്റാഗ്രാമബിലിറ്റി സ്‌കോറും ബുർജ് ഖലീഫ സ്വന്തമാക്കി. ഇൻസ്റ്റാഗ്രാമിലും ടിക്ടോക്കിലുമായി ബുർജ് ഖലീഫയെക്കുറിച്ച് 10.1 ദശലക്ഷം (1.01 കോടി) പോസ്റ്റുകളാണ് പങ്കുവെക്കപ്പെട്ടിട്ടുള്ളത്. കൂടാതെ ആഗോളതലത്തിൽ 1.1 ദശലക്ഷം (11 ലക്ഷം) ആളുകൾ ബുർജ് ഖലീഫയെക്കുറിച്ച് തിരഞ്ഞതായും കണക്കുകൾ വ്യക്തമാക്കുന്നു.