ദുബായ് : ദുബായിൽ വൻ മയക്കുമരുന്ന് കടത്ത് സംഘത്തെ പിടി കൂടുകയും അവർ കടത്താൻ ശ്രമിച്ച 200 കിലോയോളം തൂക്കം വരുന്ന (2,78,850 എണ്ണം) പ്രെഗാബാലിൻ (Pregabalin) ഗുളികകൾ ദുബായ് അധികൃതർ പിടിച്ചെടുക്കുകയും ചെയ്തു. ദുബായ് കസ്റ്റംസും ദുബായ് പൊലീസിന്റെ മയക്കുമരുന്ന് വിരുദ്ധ വിഭാഗവും സംയുക്തമായി നടത്തിയ ഓപ്പറേഷനിലാണ് നാല് പേരടങ്ങുന്ന ക്രിമിനൽ സംഘം പിടിയിലായത്. ഏഷ്യൻ രാജ്യത്ത് നിന്ന് എത്തിയ സംശയാസ്പദമായ ഒരു ഷിപ്മെന്റ് കസ്റ്റംസിന്റെ സ്മാർട്ട് റിസ്ക് എഞ്ചിൻ സിസ്റ്റം വഴി കണ്ടെത്തിയതാണ് നിർണായകമായത്.
തുടർന്ന് നടത്തിയ പരിശോധനയിൽ ഈ ഷിപ്മെന്റിൽ നിന്ന് മാത്രം 1,50,600 ഗുളികകൾ കസ്റ്റംസ് സംഘം പിടിച്ചെടുത്തു. തുടർന്ന് ദുബായ് പൊലീസുമായി ചേർന്ന് നടത്തിയ അന്വേഷണത്തിലാണ് യുഎഇയിലുള്ള നാലംഗ സംഘത്തെ അറസ്റ്റ് ചെയ്തതും ഇവരുടെ പക്കൽ നിന്ന് ബാക്കി 1,28,250 ഗുളികകൾ കൂടി കണ്ടെടുത്തതും. ആർട്ടിഫിഷ്യൽ ഇന്റലിജൻസും ഡാറ്റാ അനലിറ്റിക്സും അടിസ്ഥാനമാക്കിയുള്ള കസ്റ്റംസിന്റെ അത്യാധുനിക സംവിധാനങ്ങളാണ് ഇത്തരം വൻ സുരക്ഷാ ഭീഷണികൾ മുൻകൂട്ടി കണ്ടെത്താൻ സഹായിക്കുന്നതെന്ന് അധികൃതർ വ്യക്തമാക്കി.