അബുദാബി : എമിറേറ്റിലെത്തുന്ന വിനോദസഞ്ചാരികൾക്ക് മികച്ച സേവനവും അനുഭവവും ഉറപ്പാക്കുന്നതിനായി 11 പ്രധാന മേഖലകളെ ഉൾപ്പെടുത്തി ‘വിസിറ്റർ എക്സ്പീരിയൻസ്’ (VX) മാർഗ്ഗനിർദ്ദേശങ്ങൾ പുറത്തിറക്കി അബുദാബി സാംസ്കാരിക ടൂറിസം വകുപ്പ് (DCT Abu Dhabi). ടൂറിസം മേഖലയിലെ സേവനങ്ങളിൽ അന്താരാഷ്ട്ര ഗുണനിലവാരം പുലർത്താനും അബുദാബിയുടെ ആഗോള പ്രതിച്ഛായ കൂടുതൽ മെച്ചപ്പെടുത്താനും ലക്ഷ്യമിട്ടാണ് ഈ പുതിയ ചട്ടക്കൂട് തയ്യാറാക്കിയിരിക്കുന്നത്.
സാംസ്കാരിക കേന്ദ്രങ്ങൾ, മ്യൂസിയങ്ങൾ, ഗതാഗതം, വിനോദ കേന്ദ്രങ്ങൾ, ഹോസ്പിറ്റാലിറ്റി, ടൂർ ഗൈഡുകൾ, ഇൻഫർമേഷൻ സെന്ററുകൾ, ഇവന്റുകൾ, ക്രൂയിസ് ടെർമിനൽ, വിമാനത്താവളം, മാളുകൾ എന്നീ 11 മേഖലകളിലാണ് പ്രധാനമായും പുതിയ മാനദണ്ഡങ്ങൾ ബാധകമാക്കുക. അബുദാബി ക്വാളിറ്റി ആൻഡ് കൺഫോർമിറ്റി കൗൺസിലുമായി സഹകരിച്ച് തയ്യാറാക്കിയ ഈ നിർദ്ദേശങ്ങൾ പാലിക്കപ്പെടുന്നുണ്ടോ എന്ന് ഉറപ്പുവരുത്താൻ പരിശോധനകളും ഓഡിറ്റുകളും നടത്തുമെന്ന് ടൂറിസം വകുപ്പ് വ്യക്തമാക്കി. അബുദാബി ടൂറിസം സ്ട്രാറ്റജി 2030 ലക്ഷ്യങ്ങൾ വേഗത്തിലാക്കാൻ ഈ നടപടി സഹായിക്കും.
12