അബുദാബി : വാഹനമോടിക്കുമ്പോൾ ശ്രദ്ധ മാറുന്നതും സുരക്ഷ ഉറപ്പാക്കാതെ പ്രധാന റോഡിലേക്ക് പ്രവേശിക്കുന്നതും വലിയ അപകടങ്ങൾക്ക് കാരണമാകുമെന്ന് മുന്നറിയിപ്പ് നൽകി അബുദാബി പോലീസ്.അടുത്തിടെ എമിറേറ്റിലെ റോഡുകളിൽ സംഭവിച്ച ഭീകരമായ രണ്ട് വാഹനാപകടങ്ങളുടെ വീഡിയോ ദൃശ്യങ്ങൾ പങ്കുവെച്ചുകൊണ്ടാണ് പോലീസ് ഈ മുന്നറിയിപ്പ് നൽകിയത്. ഇന്ന് (വെള്ളിയാഴ്ച) പുറത്തിറക്കിയ അറിയിപ്പിൽ, വാഹനങ്ങൾ പ്രധാന റോഡിലേക്ക് പ്രവേശിക്കുന്നതിന് മുൻപ് മറ്റു തടസ്സങ്ങളില്ലെന്ന് ഉറപ്പുവരുത്തണമെന്നും, ഡ്രൈവിംഗിനിടെ ശ്രദ്ധ മാറ്റുന്ന കാര്യങ്ങൾ ഒഴിവാക്കി റോഡിലെ മാറ്റങ്ങളിൽ ജാഗ്രത പാലിക്കണമെന്നും പോലീസ് ഡ്രൈവർമാരോട് നിർദ്ദേശിച്ചു.
ട്രാഫിക് സുരക്ഷ വർദ്ധിപ്പിക്കുന്നതിനായി അബുദാബി പോലീസ് നടപ്പിലാക്കി വരുന്ന “യുവർ കമന്റ്” എന്ന കാമ്പയിന്റെ ഭാഗമായാണ് ഈ ദൃശ്യങ്ങൾ പുറത്തുവിട്ടത്. ഡ്രൈവർമാർ വരുത്തുന്ന പിഴവുകൾ മൂലം ഉണ്ടാകുന്ന അപകടങ്ങളെക്കുറിച്ച് പൊതുജനങ്ങളെ ബോധവാന്മാരാക്കാനും ഇത്തരം ദൗർഭാഗ്യകരമായ സംഭവങ്ങൾ കുറയ്ക്കാനുമാണ് ഈ പദ്ധതിയിലൂടെ ലക്ഷ്യമിടുന്നത്. ഇതിന് പുറമെ, യുഎഇ ട്രാഫിക് നിയമങ്ങൾ പ്രകാരം നിയമലംഘനങ്ങൾ നടത്തുന്നവർക്കുള്ള പിഴകളെക്കുറിച്ചും ശിക്ഷാ നടപടികളെക്കുറിച്ചും പോലീസ് പൊതുജനങ്ങളെ നിരന്തരം ഓർമ്മിപ്പിക്കുന്നുണ്ട്. ഡ്രൈവർമാരുടെ ഉത്തരവാദിത്തമില്ലാത്ത പെരുമാറ്റം വലിയ വില നൽകേണ്ടി വരുമെന്ന് വ്യക്തമാക്കാനാണ് അപകടങ്ങളുടെ യഥാർത്ഥ ദൃശ്യങ്ങൾ പോലീസ് പങ്കുവെക്കുന്നത്.