ഷാർജയിൽ അമിതവേഗതയിൽ വന്ന ബൈക്ക് കാറിലിടിച്ചു

ഷാർജ : ഷാർജയിൽ അമിതവേഗതയിലെത്തിയ മോട്ടോകോർസൈക്കിൾ മുന്നിൽ സഞ്ചരിച്ച കാറിലിടിച്ചുണ്ടായ അപകടത്തിന്റെ ദൃശ്യങ്ങൾ പുറത്തുവിട്ട് ഷാർജ പോലീസ്. സുരക്ഷിത അകലം പാലിക്കാത്തതും പിന്നാലെ വന്ന് ഇടിക്കുന്നതും (Tailgating) വൻ അപകടങ്ങൾക്ക് കാരണമാകുമെന്ന് പോലീസ് മുന്നറിയിപ്പ് നൽകി. സെപ്റ്റംബർ 11 വെള്ളിയാഴ്ചയാണ് പോലീസ് ഇത് സംബന്ധിച്ച ബോധവൽക്കരണ വീഡിയോ പങ്കുവെച്ചത്.

വേഗത്തിൽ വന്ന മോട്ടോകോർസൈക്കിൾ ഇടത് ലെനിൽ വെച്ച് വേഗത കുറച്ച കാറിന്റെ പിന്നിലേക്ക് ഇടിച്ചുകയറുന്നതാണ് വീഡിയോയിലുള്ളത്. ഇടിയുടെ ആഘാതത്തിൽ ബൈക്ക് യാത്രികൻ തെറിച്ചുവീഴുന്നുണ്ട്. മുന്നിലുള്ള വാഹനവുമായി കൃത്യമായ അകലം പാലിക്കുന്നത് പെട്ടെന്ന് ബ്രേക്ക് ചെയ്യേണ്ടി വരുമ്പോൾ സുരക്ഷിതമായി വാഹനം നിർത്താൻ ഡ്രൈവർമാരെ സഹായിക്കുമെന്ന് പോലീസ് വ്യക്തമാക്കി.

സുരക്ഷിതമല്ലാത്ത അകലത്തിൽ വാഹനമോടിച്ചാൽ 400 ദിർഹം പിഴയും 4 ബ്ലാക്ക് പോയിന്റുകളുമാണ് ശിക്ഷ. അശ്രദ്ധമായ ഡ്രൈവിംഗിന് യു.എ.ഇയിലെ വിവിധ എമിറേറ്റുകളിൽ കനത്ത പിഴകളാണ് ഏർപ്പെടുത്തിയിട്ടുള്ളത്. അബുദാബിയും ദുബായിലും അശ്രദ്ധമായി വാഹനമോടിച്ചാൽ 50,000 ദിർഹം വരെ പിഴ ഈടാക്കുന്നുണ്ട്. ഷാർജയിൽ പിടിച്ചെടുക്കുന്ന വാഹനങ്ങൾ വിട്ടുകിട്ടാൻ 20,000 ദിർഹം വരെ റിലീസ് ഫീസ് നൽകേണ്ടി വരും. റോഡിലെ സുരക്ഷ ഉറപ്പാക്കാൻ ഡ്രൈവർമാർ പൂർണ്ണ ശ്രദ്ധയോടെയും ഗതാഗത നിയമങ്ങൾ പാലിച്ചും വാഹനമോടിക്കണമെന്ന് അധികൃതർ ആവർത്തിച്ചു വ്യക്തമാക്കി.