അബുദാബി : യുഎഇ ഒട്ടാകെ വലിയ ആവേശമുണർത്തിയ ഇത്തിഹാദ് റെയിൽ (Etihad Rail) പാസഞ്ചർ സർവീസിന്റെ ടിക്കറ്റ് വിൽപന തുടങ്ങി 24 മണിക്കൂറിനകം ആദ്യ രണ്ട് ദിവസങ്ങളിലെ ഭൂരിഭാഗം സീറ്റുകളും വിറ്റുതീർന്നു. ജൂൺ 30-ന് ആരംഭിക്കുന്ന ആദ്യഘട്ട സർവീസിൽ അബുദാബിയിലെ മുഹമ്മദ് ബിൻ സായിദ് സിറ്റി സ്റ്റേഷനിൽ നിന്നും ഫുജൈറയിലേക്കുള്ള ട്രെയിനുകളിലെ സീറ്റുകളാണ് അതിവേഗം ബുക്ക് ചെയ്യപ്പെടുന്നത്. വെബ്‌സൈറ്റിലും ആപ്പിലും ബുക്കിംഗ് ലഭ്യമാക്കിയതോടെ ആദ്യ ദിനത്തിലെ രാവിലെ 8:19, ഉച്ചയ്ക്ക് 1:53 സമയങ്ങളിലെ പ്രീമിയം, കംഫർട്ട് ക്ലാസുകളിലെ എല്ലാ സീറ്റുകളും ഇതിനകം വിറ്റുതീർന്നു.
ജൂലൈ ഒന്നിന് അബുദാബിയിൽ നിന്നുള്ള ഉച്ചയ്ക്കത്തെ ട്രെയിനിലെ പ്രീമിയം ക്ലാസ് സീറ്റുകളും പൂർണ്ണമായി ബുക്ക് ചെയ്യപ്പെട്ടു കഴിഞ്ഞു. ഉദ്ഘാടന ഓഫറായി 50 ശതമാനം ഇളവോടെ 55 ദിർഹം മുതലാണ് കംഫർട്ട് ക്ലാസ് ടിക്കറ്റ് നിരക്കുകൾ ആരംഭിക്കുന്നത്. പ്രീമിയം ക്ലാസിന് 120 ദിർഹമാണ് നിരക്ക്. ചരിത്ര നിമിഷത്തിന്റെ ഭാഗമാകാൻ വലിയ തിരക്കാണ് അനുഭവപ്പെടുന്നതെന്നും ആപ്പിലൂടെ ടിക്കറ്റ് ഉറപ്പാക്കാൻ കഴിഞ്ഞതിൽ ഏറെ സന്തോഷമുണ്ടെന്നും ദീർഘകാലമായി യുഎഇയിലുള്ള സുരേഷ് പട്ടാളി ഉൾപ്പെടെയുള്ള ആദ്യകാല യാത്രക്കാർ പ്രതികരിച്ചു.
13