പാം ജബൽ അലിയിൽ 222 കടൽത്തീര ഭവനങ്ങൾ പുറത്തിറക്കി നഖീൽ

ദുബായ് : ദുബായിലെ പ്രമുഖ റിയൽ എസ്റ്റേറ്റ് ഡെവലപ്പറായ നഖീൽ (Nakheel), പാം ജബൽ അലിയിലെ ‘പാം സെൻട്രൽ പ്രൈവറ്റ് റെസിഡൻസസ്’ പദ്ധതിയുടെ അടുത്ത ഘട്ടമായി 222 കടൽത്തീര ഭവനങ്ങൾ വിപണിയിലിറക്കി. 2025 ഒക്ടോബറിൽ ആരംഭിച്ച പദ്ധതിയുടെ ആദ്യ ഘട്ടത്തിന് നിക്ഷേപകരിൽ നിന്ന് ലഭിച്ച വൻ സ്വീകാര്യതയെ തുടർന്നാണ് പുതിയ ഘട്ടത്തിന്റെ പ്രഖ്യാപനം. കുറഞ്ഞതും ഇടത്തരം ഉയരവുമുള്ള മൂന്ന് റെസിഡൻഷ്യൽ കെട്ടിടങ്ങളിലായി 1 മുതൽ 4 ബെഡ്‌റൂം വരെയുള്ള അപ്പാർട്ടുമെന്റുകളും, 4 മുതൽ 5 ബെഡ്‌റൂം വരെയുള്ള ടൗൺഹൗസുകളുമാണ് ഇതിൽ ഉൾപ്പെടുന്നത്.
അറേബ്യൻ ഗൾഫിന്റെ മനോഹരമായ കാഴ്ചകളും സ്വന്തമായി ബീച്ചിലേക്ക് നേരിട്ട് പ്രവേശനവുമുള്ള രീതിയിലാണ് ഈ വീടുകൾ രൂപകൽപ്പന ചെയ്തിരിക്കുന്നത്. ഫിറ്റ്നസ് സെന്റർ, ഇൻഫിനിറ്റി പൂളുകൾ, ഗെയിംസ് റൂം, കിഡ്സ് ക്ലബ്, സ്പോർട്സ് കോർട്ടുകൾ എന്നിവയും ഇതിലുണ്ടാകും. കൂടാതെ, പാം ജബൽ അലി മാസ്റ്റർപ്ലാനിന്റെ ഭാഗമായി 9,000 ചതുരശ്ര മീറ്റർ വിസ്തീർണ്ണമുള്ള റീട്ടെയ്ൽ സെന്ററും 1,000 പേർക്ക് ഒരേസമയം പ്രാർത്ഥിക്കാൻ കഴിയുന്ന ഫ്രൈഡേ മോസ്കും ഇവിടെ നിർമ്മിക്കും. ദുബായ് 2040 അർബൻ മാസ്റ്റർ പ്ലാൻ, ദുബായ് ഇക്കണോമിക് അജണ്ട (D33) എന്നിവയുടെ ഭാഗമായി വികസിപ്പിക്കുന്ന ഈ പദ്ധതി ദുബായുടെ റിയൽ എസ്റ്റേറ്റ് വിപണിയിൽ നിക്ഷേപകർക്കുള്ള ആത്മവിശ്വാസം വ്യക്തമാക്കുന്നതാണെന്ന് ദുബായ് ഹോൾഡിംഗ് റിയൽ എസ്റ്റേറ്റ് സിഇഒ ഖാലിദ് അൽ മാലിക് പറഞ്ഞു.