ഇത്തിഹാദ് റെയിലും ദുബായ് മെട്രോയും തമ്മിൽ ബന്ധിപ്പിക്കുന്നു

ദുബായ് : ഇത്തിഹാദ് റെയിലും (Etihad Rail) ദുബായ് മെട്രോയുടെ റെഡ് ലൈനും തമ്മിൽ നേരിട്ട് ബന്ധിപ്പിക്കുന്ന പുതിയ ഗതാഗത സൗകര്യം വരുന്നു. സെപ്റ്റംബർ 30 മുതൽ ദുബായിൽ നിന്ന് ഇത്തിഹാദ് റെയിൽ സർവീസുകൾ ആരംഭിക്കുമ്പോൾ, അൽ യലായീസ് (Al Yalayis) സ്‌റ്റേഷനിലിറങ്ങുന്ന യാത്രക്കാർക്ക് ജുമൈറ ഗോൾഫ് എസ്റ്റേറ്റ്‌സ് (Jumeirah Golf Estates) മെട്രോ സ്‌റ്റേഷൻ വഴി റെഡ് ലൈനിലേക്ക് എളുപ്പത്തിൽ മാറാൻ സാധിക്കും. ഇതോടെ സ്വന്തമായി വാഹനങ്ങളില്ലാതെ തന്നെ മറ്റ് എമിറേറ്റുകളിൽ നിന്ന് വരുന്നവർക്ക് ദുബായ് നഗരത്തിലുടനീളം യാത്ര ചെയ്യാനാകും.
അൽ യലായീസ് റെയിൽവേ സ്‌റ്റേഷനെയും ജുമൈറ ഗോൾഫ് എസ്റ്റേറ്റ്‌സ് മെട്രോ സ്‌റ്റേഷനെയും ബന്ധിപ്പിച്ച് പ്രത്യേക കാൽനടപ്പാലം (Footbridge) നിർമ്മിക്കുമെന്ന് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) ഡയറക്ടർ ജനറൽ മത്തർ അൽ തായർ സ്ഥിരീകരിച്ചു. ഈ കണക്റ്റിവിറ്റി വഴി ദുബായ് മറീന, മാൾ ഓഫ് ദി എമിറേറ്റ്‌സ്, ബുർജ് ഖലീഫ, ദുബായ് അന്താരാഷ്ട്ര വിമാനത്താവളം തുടങ്ങിയ പ്രധാന കേന്ദ്രങ്ങളിലേക്ക് നേരിട്ടെത്താം. യൂണിയൻ, ബുർജുമാൻ സ്‌റ്റേഷനുകൾ വഴി ഗ്രീൻ ലൈനിലേക്കും ട്രാമുകളിലേക്കും എളുപ്പത്തിൽ മാറാനും സാധിക്കും. ഭാവിയിൽ നൊൽ (nol) കാർഡ് ഉപയോഗിച്ച് ഇത്തിഹാദ് റെയിൽ ടിക്കറ്റുകളെടുക്കാനുള്ള സൗകര്യവും ആസൂത്രണം ചെയ്യുന്നുണ്ട്.