ദുബായ് : റോഡ് സുരക്ഷ വർദ്ധിപ്പിക്കുന്നതിനും പരിസ്ഥിതി സൗഹൃദ യാത്രാമാർഗ്ഗങ്ങൾ പ്രോത്സാഹിപ്പിക്കുന്നതിനുമായി 2030-ഓടെ ദുബായിൽ 31 പുതിയ കാൽനട മേൽപ്പാലങ്ങളും തുരങ്കങ്ങളും നിർമ്മിക്കാനുള്ള അഞ്ചുവർഷ പദ്ധതിക്ക് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അംഗീകാരം നൽകി. ഇതിൽ ഏറ്റവും പ്രധാനപ്പെട്ടത് ദുബായ്-അൽ ഐൻ റോഡിന് കുറുകെ നിർമ്മിക്കുന്ന, ദുബായിലെ തന്നെ ഏറ്റവും വലിയ കാൽനട-സൈക്ലിങ് മേൽപ്പാലങ്ങളിൽ ഒന്നായ 730 മീറ്റർ നീളമുള്ള കൂറ്റൻ പാലമാണ്. ഇത് ലിവാൻ പ്രദേശത്തെ ദുബായ് സിലിക്കൺ ഒയാസിസിലെ നാദ് ഹെസ്സയുമായി ബന്ധിപ്പിക്കും. ഇത്തരം ശക്തമായ അടിസ്ഥാന സൗകര്യ വികസനം വഴി ദുബായിലെ കാൽനടയാത്രക്കാരുടെ മരണനിരക്കിൽ 98 ശതമാനം കുറവ് വരുത്താൻ സാധിച്ചതായി ആർടിഎ ഡയറക്ടർ ജനറൽ മത്തർ അൽ തായർ വ്യക്തമാക്കി. സൈക്കിൾ, ഇ-സ്കൂട്ടർ യാത്രക്കാർക്കായി അത്യാധുനിക സുരക്ഷാ-അലാറം സംവിധാനങ്ങളോടെയാണ് പുതിയ പാലങ്ങളെല്ലാം ഒരുക്കുകയെന്നും അതോറിറ്റി അറിയിച്ചു.