ചരിത്ര നേട്ടവുമായി ദുബായ് അന്താരാഷ്ട്ര വിമാനത്താവളം

ദുബായ് : 1960-ൽ പ്രവർത്തനം ആരംഭിച്ചതുമുതൽ ഇതുവരെ ദുബായ് അന്താരാഷ്ട്ര വിമാനത്താവളം (DXB) കൈകാര്യം ചെയ്തത് 150 കോടി (1.5 billion) യാത്രക്കാരെയെന്ന് ദുബായ് ഗവൺമെന്റ് മീഡിയ ഓഫീസ് അറിയിച്ചു. ലോകത്തിലെ ഏറ്റവും തിരക്കേറിയ അന്താരാഷ്ട്ര വ്യോമയാന കേന്ദ്രങ്ങളിലൊന്നായ ദുബായ് വിമാനത്താവളത്തിന്റെ വളർച്ചയിലെ സുപ്രധാന നാഴികക്കല്ലാണിത്. ദുബായ് എയർപോർട്ട്സ് സിഇഒ പോൾ ഗ്രിഫിത്ത്സ് പങ്കെടുത്ത പ്രത്യേക മാധ്യമ സമ്മേളനത്തിലാണ് ഈ കണക്കുകൾ പുറത്തുവിട്ടത്.
2026-ന്റെ ആദ്യ പകുതിയിൽ മാത്രം 3.15 കോടി (31.5 million) യാത്രക്കാരാണ് ഡിഎക്സ്ബി വഴി യാത്ര ചെയ്തത്. ജനുവരി മുതൽ ജൂലൈ വരെയുള്ള പ്രതിമാസ കണക്കുകളിൽ 26 ശതമാനം വർദ്ധനവ് രേഖപ്പെടുത്തി. 2026 അവസാനത്തോടെ ആകെ യാത്രക്കാരുടെ എണ്ണം 7 കോടിയിലെത്തുമെന്നും 2027 അവസാനത്തോടെ ഇത് 10 കോടിയായി ഉയരുമെന്നും പ്രതീക്ഷിക്കുന്നു. നിലവിൽ ട്രാഫിക് ശേഷിയുടെ 84 ശതമാനവും തിരിച്ചുകിട്ടിക്കഴിഞ്ഞു.
അതേസമയം അൽ മക്തൂം അന്താരാഷ്ട്ര വിമാനത്താവളത്തിന്റെ വികസന പ്രവർത്തനങ്ങൾ വേഗത്തിൽ പുരോഗമിക്കുകയാണ്. ആദ്യ ഘട്ടത്തിൽ 15 കോടി യാത്രക്കാരെ ഉൾക്കൊള്ളാൻ ശേഷിയുള്ള ഈ വിമാനത്താവളം പൂർണ്ണ സജ്ജമാകുമ്പോൾ പ്രതിവർഷം 26 കോടി യാത്രക്കാരെ കൈകാര്യം ചെയ്യും. ദുബായ് അന്താരാഷ്ട്ര വിമാനത്താവളത്തിൽ നിന്നുള്ള സർവീസുകൾ ഘട്ടങ്ങളായി പുതിയ വിമാനത്താവളത്തിലേക്ക് മാറ്റും. ആർട്ടിഫിഷ്യൽ ഇന്റലിജൻസും ഫേഷ്യൽ റെക്കഗ്നിഷൻ സാങ്കേതികവിദ്യയും ഉപയോഗിച്ച് ക്യൂ രഹിത ബോർഡിംഗ് അനുഭവമാണ് അൽ മക്തൂമിൽ യാത്രക്കാരെ കാത്തിരിക്കുന്നത്.