അൽ മക്തൂം വിമാനത്താവള വികസനം: ഒന്നാം ഘട്ടം 2032-ൽ പ്രവർത്തനസജ്ജമാകും

ദുബായ് : ലോകത്തിലെ ഏറ്റവും വലിയ വ്യോമയാന ഹബ്ബായി മാറാനൊരുങ്ങുന്ന ദുബായിലെ അൽ മക്തൂം അന്താരാഷ്ട്ര വിമാനത്താവള വികസന പദ്ധതിയുടെ ഒന്നാം ഘട്ടം 2032-ൽ പ്രവർത്തനസജ്ജമാകുമെന്ന് ദുബായ് സർക്കാർ സ്ഥിരീകരിച്ചു. റൺവേകളും ടെർമിനലുകളുടെ പ്രാരംഭ അടിത്തറയും ഉൾപ്പെടെയുള്ള സുപ്രധാന നിർമ്മാണ ഘട്ടങ്ങൾ ഇതിനകം പൂർത്തിയായിട്ടുണ്ട്. നിലവിൽ 1,300 കോടി ദിർഹത്തിന്റെ കരാറുകൾ പുരോഗമിക്കുന്ന പദ്ധതി പ്രദേശത്ത് അടുത്ത ഘട്ടത്തിൽ 5,500 കോടിയിലധികം ദിർഹത്തിന്റെ പുതിയ കരാറുകൾ കൂടി അനുവദിക്കും. പൂർണ്ണമായും സജ്ജമാകുന്നതോടെ പ്രതിവർഷം 26 കോടി യാത്രക്കാരെ കൈകാര്യം ചെയ്യാൻ ഈ മെഗാ വിമാനത്താവളത്തിന് ശേഷിയുണ്ടാകും. ദുബായുടെ സാമ്പത്തിക വളർച്ചയിലും വ്യോമയാന മേഖലയിലും ഇത് വലിയ കുതിച്ചുചാട്ടമുണ്ടാക്കുമെന്ന് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും വ്യക്തമാക്കി.