അബുദാബി : ഇടപാടുകാരൻ കുടിശ്ശിക വരുത്തിയ 57.86 ലക്ഷം ദിർഹത്തിന്റെ ഇസ്ലാമിക് ഫിനാൻസ് അക്കൗണ്ട് തീർപ്പാക്കൽ തുകയുമായി ബന്ധപ്പെട്ട് അപ്പീൽ കോടതി പുറപ്പെടുവിച്ച വിധി യുഎഇ ഫെഡറൽ സുപ്രീം കോടതി റദ്ദാക്കി. വാണിജ്യ ബാങ്ക് നൽകിയ ഹർജി ശരിവച്ചാണ് നടപടി. കേസ് പുനഃപരിശോധിക്കുന്നതിനായി അപ്പീൽ കോടതിയിലേക്ക് തന്നെ തിരിച്ചയക്കാൻ സുപ്രീം കോടതി ഉത്തരവിട്ടു. വാടകയ്ക്ക് നൽകി ഉടമസ്ഥാവകാശം കൈമാറുന്ന ‘ലീസ് എൻഡിംഗ് വിത്ത് ഓണർഷിപ്പ്’ (ഇജാറ) എന്ന ഇസ്ലാമിക് ഫിനാൻസിംഗ് തത്വങ്ങൾ പാലിക്കാതെ പരമ്പരാഗത വായ്പാ നിയമങ്ങൾ അനുസരിച്ചാണ് മുൻ ഉത്തരവ് പുറപ്പെടുവിച്ചതെന്ന് ചൂണ്ടിക്കാട്ടിയാണ് സുപ്രീം കോടതിയുടെ നിർണ്ണായക തീരുമാനം.
50 ലക്ഷം ദിർഹം ബാങ്ക് ഫിനാൻസിംഗ് എടുത്ത വ്യക്തി കൃത്യമായി ഗഡുക്കൾ അടയ്ക്കുന്നതിൽ വീഴ്ച വരുത്തിയതിനെ തുടർന്നാണ് ബാങ്ക് നിയമനടപടി സ്വീകരിച്ചത്. വിപണിയിൽ നിശ്ചയിച്ച ലാഭവിഹിതം ഇസ്ലാമിക് ഫിനാൻസിംഗ് തത്വങ്ങൾ അനുസരിച്ച് കരാർ തുകയുടെ അവിഭാജ്യ ഘടകമാണെന്നിരിക്കെ, സാദാ ബാങ്കിംഗ് ലോണുകളുടെ അടിസ്ഥാനത്തിൽ കണക്കാക്കി കുടിശ്ശിക തുക 48.17 ലക്ഷം ദിർഹമായി കുറച്ച അപ്പീൽ കോടതിയുടെ വിധി നിയമപരമായി നിലനിൽക്കില്ലെന്ന് സുപ്രീം കോടതി വ്യക്തമാക്കി. ബാങ്ക് ഉന്നയിച്ച തടസ്സവാദങ്ങൾ വ്യക്തമായി പരിശോധിക്കാതെ വിധി പ്രസ്താവിച്ചത് റദ്ദാക്കലിന് കാരണമായി.
3