ദുബായ്: പകൽസമയങ്ങളിലെ ഗതാഗത തടസ്സങ്ങൾ ഒഴിവാക്കുന്നതിനും യാത്രാസൗകര്യം സുഗമമാക്കുന്നതിനുമായി രാത്രികാല റോഡ് അറ്റകുറ്റപ്പണികൾ ശക്തമാക്കി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). വാഹ തിരക്ക് കുറഞ്ഞ രാത്രി സമയങ്ങൾ പ്രയോജനപ്പെടുത്തിയാണ് റോഡുകളുടെ പ്രതിരോധവും പരിഹാരവുമായ നവീകരണ പ്രവർത്തനങ്ങൾ നടത്തുന്നത്. കൃത്യമായ വിലയിരുത്തലുകളിലൂടെയും മുൻകൂട്ടി തയ്യാറാക്കിയ അറ്റകുറ്റപ്പണി പദ്ധതികളിലൂടെയും ദുബായിലെ റോഡ് ശൃംഖലയിൽ 95 ശതമാനവും മികച്ച റേറ്റിംഗ് നിലനിർത്താൻ സാധിച്ചിട്ടുണ്ടെന്ന് ആർടിഎ വ്യക്തമാക്കി.
റോഡ് ഉപരിതലം റീ-ലാമിനേറ്റ് ചെയ്യൽ, പാലങ്ങൾ, ടണലുകൾ, മഴവെള്ള ഓടകൾ, സ്ട്രീറ്റ് ലൈറ്റുകൾ, ട്രാഫിക് സിഗ്നലുകൾ, സുരക്ഷാ ബാരിയറുകൾ എന്നിവയുടെ അറ്റകുറ്റപ്പണികളാണ് പ്രധാനമായും രാത്രികാലങ്ങളിൽ നടക്കുന്നത്. 2026-ലെ മുൻകരുതൽ പരിപാലന പദ്ധതി പ്രകാരം ജൂൺ ആദ്യത്തോടെ 9 പ്രധാന റോഡുകളിലും 6 മേഖലകളിലുമായി 17 കിലോമീറ്റർ റോഡ് ഉപരിതലം പുനരുദ്ധരിച്ചു. മുൻവർഷത്തെ 88,000 ചതുരശ്ര മീറ്ററിന് പകരം ഈ വർഷം 90,000 ചതുരശ്ര മീറ്റർ നടപ്പാതകളുടെ പരിപാലനമാണ് ആർടിഎ ലക്ഷ്യമിടുന്നത്. കൃത്യമായ ട്രാഫിക് മാനേജ്‌മെന്റിലൂടെ രാവിലത്തെ തിരക്കിന് മുൻപ് എല്ലാ ലൈനുകളും ഗതാഗതത്തിനായി തുറന്നുകൊടുക്കുന്നുണ്ടെന്നും അധികൃതർ ഉറപ്പുവരുത്തുന്നുണ്ട്.