ഷാർജ: ഷാർജ ഗവൺമെന്റ് ജീവനക്കാരുടെയും വിരമിച്ചവരുടെയും ക്ഷേമം ഉറപ്പാക്കുന്നതിനായി പ്രതിമാസ കുറഞ്ഞ വേതനം (Decent Living Standard) 20,000 ദിർഹമായി ഉയർത്തി സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ഉത്തരവിട്ടു. 1.187 ശതകോടി ദിർഹത്തിലധികം വാർഷിക ചെലവ് വരുന്ന ഈ തീരുമാനം സെപ്റ്റംബർ മാസം മുതൽ പ്രാബല്യത്തിൽ വരും. ജീവനക്കാർക്ക് പുറമെ സാമ്പത്തിക സഹായം കൈപ്പറ്റുന്ന കുടുംബങ്ങൾ, സർക്കാർ സർവീസിൽ നിന്നും മറ്റ് മേഖലകളിൽ നിന്നും വിരമിച്ച സ്വദേശികൾ എന്നിവർക്കും ഈ ആനുകൂല്യം ലഭ്യമാകും. പതിനായിരക്കണക്കിന് സ്വദേശി കുടുംബങ്ങൾക്കാണ് ഈ തീരുമാനത്തിന്റെ പ്രയോജനം ലഭിക്കുന്നത്.
ഇതുകൂടാതെ മത്സ്യബന്ധന മേഖലയെ പിന്തുണയ്ക്കുന്നതിനായി ബോട്ടുകൾ അടുപ്പിക്കുന്നതിനുള്ള ബർത്ത് ഫീസിൽ (Marine Vessel Berths) 50 ശതമാനം ഇളവും ഭരണാധികാരി പ്രഖ്യാപിച്ചു. ദുബായ്, അബുദാബി സർക്കാരുകളിലെ ശമ്പള നിരക്കുകൾക്ക് സമാനമായി ഷാർജയിലെ ഉയർന്ന തസ്തികകളിലുള്ള ജീവനക്കാരുടെ ശമ്പള വർദ്ധനവിനെക്കുറിച്ചുള്ള പഠനം നടന്നു വരികയാണെന്നും അടുത്ത ആഴ്ച ഇതിൽ തീരുമാനമുണ്ടാകുമെന്നും അദ്ദേഹം ‘അൽ ഖാത്ത് അൽ മുബാഷിർ’ റേഡിയോ പരിപാടിയിലൂടെ വ്യക്തമാക്കി. അനാവശ്യ വായ്പകൾ ഒഴിവാക്കി സാമ്പത്തിക അച്ചടക്കം പാലിക്കാനും കുട്ടികൾക്ക് നല്ല രീതിയിലുള്ള ശിക്ഷണം നൽകാനും അദ്ദേഹം പൗരന്മാരോട് ആഹ്വാനം ചെയ്തു.
13