ദുബായ് : സാധാരണയായി തണുപ്പുകാലത്താണ് മൂടൽമഞ്ഞ് കണ്ടാറുള്ളതെങ്കിലും, യുഎഇയിൽ കടുത്ത വേനൽക്കാലത്തും പുലർച്ചെ സമയങ്ങളിൽ റോഡുകളിൽ കനത്ത മൂടൽമഞ്ഞ് (Fog) രൂപപ്പെടാറുണ്ട്. അന്തരീക്ഷത്തിലെ ഈ പ്രതിഭാസത്തിന് പിന്നിലെ ശാസ്ത്രീയ കാരണങ്ങൾ കാലാവസ്ഥാ നിരീക്ഷകർ വ്യക്തമാക്കുന്നു. വേനൽക്കാലത്ത് അറേബ്യൻ ഗൾഫിൽ നിന്നും അറബിക്കടലിൽ നിന്നുമുള്ള ഈർപ്പമുള്ള ചൂടുള്ള വായു വൈകുന്നേരങ്ങളിൽ കരയിലേക്ക് വീശുകയും ഇത് അന്തരീക്ഷത്തിൽ ഉയർന്ന അളവിൽ ഹുമിഡിറ്റി (ഈർപ്പം) ഉണ്ടാക്കുകയും ചെയ്യുന്നു. സൂര്യാസ്തമയത്തിന് ശേഷം മരുഭൂമിയിലെ മണൽ അതിവേഗം തണുക്കുന്നതോടെ (Radiative cooling), നിലത്തോട് ചേർന്നുള്ള വായുവും തണുക്കുന്നു. അന്തരീക്ഷത്തിൽ അടങ്ങിയിരിക്കുന്ന നേർത്ത പൊടിപടലങ്ങളിലും മണൽത്തരികളിലും ഈ ജലബാഷ്പം വന്ന് അടിഞ്ഞു കൂടുന്നതോടെയാണ് കനത്ത മൂടൽമഞ്ഞ് രൂപപ്പെടുന്നത്. പ്രധാനമായും ഓഗസ്റ്റ് മാസത്തിലാണ് ഇത്തരം പ്രതിഭാസങ്ങൾ കൂടുതൽ കാണപ്പെടാറുള്ളതെന്നും, കാഴ്ചപരിധി കുറയുന്നതിനാൽ ഈ സമയങ്ങളിൽ ഡ്രൈവർമാർ അതീവ ജാഗ്രത പാലിക്കണമെന്നും നാഷണൽ സെന്റർ ഓഫ് മെറ്റീരിയോളജി അറിയിച്ചു.
