അബുദാബി : യുഎഇയിലെ വിവിധ മസ്ജിദുകളിൽ ജൂലൈ 3-ന് നടന്ന വെള്ളിയാഴ്ച ഖുതുബയിൽ കഠിനമായ വേനൽക്കാലത്തെ ക്ഷമയോടെയും നന്ദിയോടെയും വരവേൽക്കാൻ വിശ്വാസികളോട് ആഹ്വാനം ചെയ്തു. മാറിവരുന്ന ഓരോ കാലാവസ്ഥയും അല്ലാഹുവിന്റെ വലിയ ദൃഷ്ടാന്തങ്ങളും അനുഗ്രഹങ്ങളുമാണ്. കടുത്ത ചൂടിനെ ചീത്ത പറയുകയോ പരാതിപ്പെടുകയോ ചെയ്യരുത്. ഈ ചൂടുകാലമാണ് നാടിന്റെ കാർഷിക സമ്പത്തായ ഈന്തപ്പഴങ്ങൾ പാകമാകാൻ സഹായിക്കുന്നത്.
വേനലവധി കാലം വെറുതെ കളയാതെ കുടുംബത്തോടൊപ്പം ചിലവഴിക്കാനും മക്കൾക്ക് സ്നേഹവും സുരക്ഷയും നൽകാനും രക്ഷിതാക്കൾ ശ്രദ്ധിക്കണം. കുട്ടികളുടെ ഇലക്ട്രോണിക് ഉപകരണങ്ങളുടെ ഉപയോഗം നിയന്ത്രിക്കുകയും അവരുടെ സർഗ്ഗാത്മക കഴിവുകൾ വളർത്താൻ സമയം കണ്ടെത്തുകയും വേണം. എയർകണ്ടീഷണറുകൾ ഉൾപ്പെടെയുള്ള എല്ലാ അത്യാധുനിക യാത്രാ-താമസ സൗകര്യങ്ങളും സുരക്ഷിതമായി ഒരുക്കിത്തന്ന യുഎഇ ഭരണകൂടത്തിന് നന്ദി രേഖപ്പെടുത്താനും സ്വന്തം രാജ്യത്തെ വിനോദസഞ്ചാര കേന്ദ്രങ്ങൾ മക്കൾക്കൊപ്പം സന്ദർശിച്ച് ആസ്വദിക്കാനും ഖുതുബയിൽ ഓർമ്മിപ്പിച്ചു. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെയും മറ്റ് ഭരണാധികാരികളുടെയും ആരോഗ്യത്തിനും രാജ്യത്തിന്റെ സുരക്ഷയ്ക്കുമായി പ്രത്യേക പ്രാർത്ഥനയോടെയാണ് ഖുതുബ അവസാനിച്ചത്.