അബുദാബി : അബുദാബിയിലെ പ്രധാന റോഡുകളിൽ രാവിലെ കനത്ത ഗതാഗതക്കുരുക്ക് അനുഭവപ്പെടുന്നതായി റിപ്പോർട്ട്. ഖലീഫ സിറ്റി, അൽ റൗദ, ഷഖ്ബൂത്ത് സിറ്റി, നഗരത്തിന് പുറത്തേക്കുള്ള പ്രധാന പാതകൾ എന്നിവിടങ്ങളിലാണ് ഗതാഗതം സങ്കീർണ്ണമായി തുടരുന്നത്. ഖലീഫ സിറ്റിയിലൂടെ കടന്നുപോകുന്ന അൽ ഖലീജ് അൽ അറബി സ്ട്രീറ്റിലും സായിദ് യൂണിവേഴ്സിറ്റി ഇന്റർചേഞ്ചിലേക്കുള്ള റോഡുകളിലും വാഹനങ്ങൾ വളരെ സാവധാനത്തിലാണ് നീങ്ങുന്നത്. കൂടാതെ ദുബായിലേക്ക് ബന്ധിപ്പിക്കുന്ന ഷെയ്ഖ് സായിദ് ബിൻ സുൽത്താൻ സ്ട്രീറ്റിൽ അൽ റാഹ ഗാർഡൻസിന് സമീപവും ഗതാഗത തടസ്സം രേഖപ്പെടുത്തിയിട്ടുണ്ട്.
അബുദാബി സെൻട്രൽ മേഖലയിലെ വേൾഡ് ട്രേഡ് സെന്റർ, അൽ ബതീൻ എന്നിവിടങ്ങൾക്ക് സമീപമുള്ള അൽ ഖലീജ് അൽ അറബി സ്ട്രീറ്റിലും മുഷ്രിഫ് മോളിന് അടുത്തുള്ള മുബാറക് ബിൻ മുഹമ്മദ് സ്ട്രീറ്റ്, ഷഖ്ബൂത്ത് ബിൻ സുൽത്താൻ സ്ട്രീറ്റ് എന്നിവടങ്ങളിലും വാഹനഗതാഗതം മന്ദഗതിയിലാണ്. അൽ റൗദയിൽ വാഹനാപകടത്തെ തുടർന്ന് ഗതാഗത തടസ്സമുണ്ടായതായി ഗൂഗിൾ മാപ്സ് തത്സമയ വിവരങ്ങൾ വ്യക്തമാക്കുന്നു. അൽ ഫലാഹിന് സമീപമുള്ള സ്വൈഹാൻ റോഡിലും ഷഖ്ബൂത്ത് സിറ്റിയിലൂടെയുള്ള അൽ ഐൻ റോഡിലും യാത്രാ തടസ്സം നേരിടുന്നുണ്ട്. അതിനാൽ യാത്രക്കാർ കൃത്യമായി സമയം പ്ലാൻ ചെയ്ത് പുറപ്പെടാനും മാപ്പ് ആപ്പുകൾ വഴി ഗതാഗത സാഹചര്യങ്ങൾ പരിശോധിച്ച് യാത്രാമാർഗ്ഗം തിരഞ്ഞെടുക്കാനും അധികൃതർ നിർദ്ദേശിക്കുന്നു.
