ദുബായ് : യുഎസ്-ഇറാൻ യുദ്ധം ഉണ്ടാക്കിയ തടസ്സങ്ങളെ അതിജീവിച്ച് ദുബായ് ടൂറിസം മേഖല ശക്തമായ തിരിച്ചുവരവിന് ഒരുങ്ങുന്നു. അടുത്ത ആഴ്ച ആരംഭിക്കുന്ന അറബിയൻ ട്രാവൽ മാർക്കറ്റിന്റെ (എടിഎം) 33-ാം പതിപ്പിന് മുന്നോടയാണ് ദുബായ് ഈ ലക്ഷ്യങ്ങൾ പ്രഖ്യാപിച്ചത്. ദീർഘകാല തന്ത്രങ്ങൾ, ആഗോള കണക്റ്റിവിറ്റി, പൊതു-സ്വകാര്യ മേഖലകളുടെ കൃത്യമായ ഏകോപനം എന്നിവയിലൂടെ പ്രതിസന്ധികളെ മറികടക്കാനാകുമെന്നാണ് ദുബായ് ടൂറിസത്തിന്റെ വിലയിരുത്തൽ.
കഴിഞ്ഞ വർഷം (2025) 1.96 കോടി (19.6 ദശലക്ഷം) അന്താരാഷ്ട്ര സന്ദർശകരെ സ്വീകരിച്ചുകൊണ്ട് ദുബായ് മികച്ച നേട്ടമാണ് കൈവരിച്ചത്. ഡിസംബർ മാസത്തിൽ മാത്രം ഏകദേശം 20 ലക്ഷം സന്ദർശകർ എത്തിയത് റെക്കോർഡാണെന്ന് ദുബായ് ടൂറിസം ആൻഡ് കോമേഴ്സ് മാർക്കറ്റിംഗ് (ഡിസിടിസിഎം) സിഇഒ ഇസ്സാം കാസിം വാർത്താസമ്മേളനത്തിൽ വ്യക്തമാക്കി. കാര്യങ്ങൾ ശരിയായ ദിശയിലാണ് നീങ്ങുന്നതെന്നും അദ്ദേഹം പറഞ്ഞു.
എങ്കിലും, സമീപകാലത്തെ സംഘർഷങ്ങളും യാത്രാ മുന്നറിയിപ്പുകളും വിമാന സർവീസുകളെയും സന്ദർശകരുടെ വരവിനെയും ബാധിച്ചിട്ടുണ്ടെന്ന് അദ്ദേഹം സമ്മതിച്ചു. വിമാന സർവീസുകളിലെ വ്യതിയാനങ്ങളും ട്രാവൽ അഡ്വൈസറികളും ടൂറിസം മേഖലയെ സ്വാധീനിക്കുന്നുണ്ടെങ്കിലും ശക്തമായ തിരിച്ചുവരവിനുള്ള തയ്യാറെടുപ്പിലാണ് നഗരം.
