ദുബായ് : ഹിജ്റ പുതുവത്സര (1448 AH)ത്തോടനുബന്ധിച്ച് യുഎഇയിലെയും ലോകമെമ്പാടുമുള്ളതുമായ മുഴുവൻ മുസ്ലിംകൾക്കും ആശംസകൾ നേർന്ന് യുഎഇ ഭരണാധികാരികൾ. പുതിയ വർഷം യുഎഇയിലും മറ്റ് ഇസ്ലാമിക രാജ്യങ്ങളിലും സമാധാനവും പുരോഗതിയും സ്ഥിരതയും കൊണ്ടുവരട്ടെയെന്ന് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ആശംസിച്ചു. അറബ്-ഇസ്ലാമിക സമൂഹങ്ങൾക്കും യുഎഇയിലെ ജനങ്ങൾക്കും അനുഗ്രഹങ്ങളും സമൃദ്ധിയും ഉണ്ടാകാൻ പ്രാർത്ഥിക്കുന്നതായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തും വ്യക്തമാക്കി. ചരിത്രത്തെ മാറ്റിമറിച്ച പ്രവാചകന്റെ മക്കയിൽ നിന്നുള്ള മദീനാ പലായനത്തിന്റെ (ഹിജ്റ) ഓർമ്മകൾ പുതുക്കുന്നതാണ് ഈ ദിനമെന്ന് ദുബായ് കിരീടാവകാശിയും യുഎഇ പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും ഓർമ്മിപ്പിച്ചു. ശാസ്ത്രീയ വിവരങ്ങളുടെ അടിസ്ഥാനത്തിൽ ജൂൺ 16 ചൊവ്വാഴ്ചയാണ് യുഎഇയിൽ മുഹറം ഒന്നായി പ്രഖ്യാപിച്ചത്.
