4
അബുദാബി: യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുല്ല ബിൻ സായിദ് അൽ നഹ്യാനും ഇന്ത്യൻ വിദേശകാര്യ മന്ത്രി ഡോ. സുബ്രഹ്മണ്യ ജയശങ്കറും തമ്മിൽ കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള സമഗ്ര തന്ത്രപരമായ പങ്കാളിത്തത്തിന്റെയും സമഗ്ര സാമ്പത്തിക പങ്കാളിത്തത്തിന്റെയും (CEPA) കീഴിൽ ഉഭയകക്ഷി സഹകരണം കൂടുതൽ ശക്തിപ്പെടുത്തുന്നതിനുള്ള വഴികൾ ഇരുവരും ചർച്ച ചെയ്തു.
അബുദാബിയിൽ നടന്ന കൂടിക്കാഴ്ചയിൽ സമ്പദ്‌വ്യവസ്ഥ, വ്യാപാരം, നിക്ഷേപം തുടങ്ങിയ വിവിധ മേഖലകളിൽ ഉഭയകക്ഷി സഹകരണം കൈവരിച്ച പുരോഗതികൾ മന്ത്രിമാർ വിലയിരുത്തി. ഇരുരാജ്യങ്ങളുടെയും വികസന മുൻഗണനകളെ പിന്തുണയ്ക്കുന്ന മറ്റ് മേഖലകളിലെ സഹകരണവും ചർച്ചയായി.
ഡോ. ജയശങ്കറെ അബുദാബിയിലേക്ക് സ്വാഗതം ചെയ്ത ഷെയ്ഖ് അബ്ദുല്ല, യുഎഇയും ഇന്ത്യയും തമ്മിലുള്ള ആഴത്തിലുള്ളതും ദീർഘകാലവുമായ ബന്ധം ഒരിക്കൽക്കൂടി ഓർമ്മിപ്പിച്ചു. വിവിധ മേഖലകളിൽ സഹകരണം വ്യാപിപ്പിക്കുന്നതിനും ജനങ്ങൾക്ക് സമൃദ്ധി എത്തിക്കുന്നതിനുമുള്ള പ്രതിബദ്ധതയും നേതാക്കൾ ആവർത്തിച്ചു വ്യക്തമാക്കി. കൂടാതെ, മേഖലയിലെ നിലവിലെ സംഭവവികാസങ്ങളും മാറിക്കൊണ്ടിരിക്കുന്ന സാഹചര്യങ്ങളും മന്ത്രിമാർ ചർച്ച ചെയ്തു.