നവരാത്രി, ദീപാവലി ആഘോഷങ്ങൾക്ക് മുൻപ് യുഎഇയിൽ സ്വർണ്ണവില വീണ്ടും കുറഞ്ഞു

ദുബായ് : നവരാത്രി , ദീപാവലി ആഘോഷങ്ങൾ ആരംഭിക്കാനിരിക്കെ യുഎഇയിൽ സ്വർണ്ണവിലയിൽ വീണ്ടും ഇടിവ്. യുഎസ് ഡോളർ കരുത്താർജ്ജിച്ചതും ട്രഷറി ബോണ്ട് യീൽഡ് ഉയർന്നതുമാണ് അന്താരാഷ്ട്ര വിപണിയിൽ സ്വർണ്ണവില കുറയാൻ കാരണമായത്. ചൊവ്വാഴ്ച രാവിലെ വിപണി തുറന്നപ്പോൾ 24 കാരറ്റ് സ്വർണ്ണത്തിന് ഗ്രാമിന് 496.75 ദിർഹമായി കുറഞ്ഞു. തിങ്കളാഴ്ച വിപണി അടയ്ക്കുമ്പോൾ ഇത് 498.50 ദിർഹമായിരുന്നു. കഴിഞ്ഞ ഒരു മാസത്തിനിടെ ഗ്രാമിന് 37 ദിർഹത്തിന്റെ കുറവാണ് യുഎഇ വിപണിയിൽ രേഖപ്പെടുത്തിയത്.
മറ്റ് ഗ്രേഡുകളിലും വിലക്കുറവ് പ്രകടമാണ്; 22 കാരറ്റ് സ്വർണ്ണത്തിന് ഗ്രാമിന് 460.00 ദിർഹവും 21 കാരറ്റ് സ്വർണ്ണത്തിന് 441.00 ദിർഹവും 18 കാരറ്റ് സ്വർണ്ണത്തിന് 378.00 ദിർഹവുമാണ് ചൊവ്വാഴ്ച രാവിലത്തെ നിരക്കുകൾ. അന്താരാഷ്ട്ര വിപണിയിൽ സ്പോട്ട് ഗോൾഡ് വില ഔൺസിന് 4,122 ഡോളറിലേക്ക് താഴ്ന്നു. ഉത്സവ സീസണിന് മുന്നോടിയായി വില ഗ്രാമിന് 500 ദിർഹത്തിന് താഴെയെത്തിയത് യുഎഇയിലെ ഇന്ത്യൻ പ്രവാസികൾക്കും ആഘോഷങ്ങൾക്കായി സ്വർണ്ണം വാങ്ങുന്നവർക്കും ആശ്വാസമായിട്ടുണ്ട്. സമീപഭാവിയിൽ സ്വർണ്ണവില വീണ്ടും താഴ്ന്ന് ഔൺസിന് 4,100 മുതൽ 4,000 ഡോളർ വരെയെത്താൻ സാധ്യതയുണ്ടെന്നാണ് വിപണി വിദഗ്ദ്ധരുടെ വിലയിരുത്തൽ.