15
ദുബായ് : യുഎഇ ദിർഹത്തിന്റെ സ്വന്തം ചിഹ്നത്തിന് ഔദ്യോഗിക ഡിജിറ്റൽ അംഗീകാരം. ഫോണുകൾ, കമ്പ്യൂട്ടറുകൾ, ആപ്പുകൾ, വെബ്‌സൈറ്റുകൾ എന്നിവയിൽ ദിർഹം ചിഹ്നം സ്റ്റാൻഡേർഡായി പ്രദർശിപ്പിക്കാൻ വഴിയൊരുക്കിക്കൊണ്ട് യൂണികോഡ് 18.0 (Unicode 18.0)-ൽ യുഎഇ ദിർഹം ചിഹ്നം ഉൾപ്പെടുത്തി.
സോഫ്റ്റ്‌വെയറുകൾക്ക് എളുപ്പത്തിൽ തിരിച്ചറിയാൻ കഴിയുന്ന തരത്തിൽ ‘U+20C3’ എന്ന യുണീക്ക് കോഡാണ് ഈ ചിഹ്നത്തിന് യൂണികോഡ് അനുവദിച്ചിരിക്കുന്നത്. മറ്റ് കറൻസി ചിഹ്നങ്ങൾക്കൊപ്പം ഡിജിറ്റൽ ടെക്സ്റ്റുകളിൽ ദിർഹം ചിഹ്നവും ഇനി മുതൽ സുഗമമായി ഉപയോഗിക്കാൻ സാധിക്കും.
സെപ്റ്റംബർ 16-ന് പുറത്തിറക്കിയ അപ്‌ഡേറ്റിലെ ഏറ്റവും പ്രതീക്ഷയോടെ കാത്തിരുന്ന പുതിയ പ്രതീകങ്ങളിലൊന്നായാണ് യൂണികോഡ് കൺസോർഷ്യം ദിർഹം ചിഹ്നത്തെ വിശേഷിപ്പിച്ചത്. മാലിദ്വിയൻ റുഫിയ, ഒമാനി റിയാൽ എന്നീ കറൻസി ചിഹ്നങ്ങളും ഇതേ അപ്‌ഡേറ്റിൽ ഉൾപ്പെടുത്തിയിട്ടുണ്ട്.
യൂണിഫോം കോഡുകൾ ഇല്ലാത്തത് ഡിജിറ്റൽ പ്ലാറ്റ്‌ഫോമുകളിൽ ഇവയുടെ ഉപയോഗം പരിമിതപ്പെടുത്തിയിരുന്നു. എന്നാൽ പുതിയ മാറ്റത്തോടെ സാങ്കേതിക കമ്പനികൾക്ക് ഈ ചിഹ്നങ്ങൾക്കായുള്ള പിന്തുണ അവരുടെ പ്ലാറ്റ്‌ഫോമുകളിൽ നൽകാൻ കഴിയുമെന്ന് യൂണികോഡ് വ്യക്തമാക്കി.