ദുബായ് : ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയും ദുബായ് എക്‌സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തുമിന്റെ രക്ഷാകർതൃത്വത്തിൽ സംഘടിപ്പിച്ച ‘ദുബായ് മല്ലത്തൺ’ (Dubai Mallathon) രണ്ടാം പതിപ്പിന് ആവേശകരമായ സമാപനം. ജൂൺ 15 മുതൽ സെപ്റ്റംബർ 15 വരെ ദുബായ് സ്‌പോർട്‌സ് കൗൺസിലും പ്രതിരോധ മന്ത്രാലയവും സംയുക്തമായി സംഘടിപ്പിച്ച ഈ കായിക മാമാങ്കത്തിൽ 160,475 ആളുകൾ പങ്കെടുത്തു. വിവിധ മാളുകളിലായി നടന്ന നടപ്പിലൂടെയും ഓട്ടത്തിലൂടെയും പങ്കെടുത്തവർ ആകെ 29 കോടിയിലേറെ (290 million) ചുവടുകളാണ് രേഖപ്പെടുത്തിയത്.
വേനൽക്കാലത്ത് മാളുകളെയും പ്രധാന കേന്ദ്രങ്ങളെയും ഇൻഡോർ കായിക വേദികളാക്കി മാറ്റിയ ഈ പദ്ധതിയിൽ ദുബായ് ഇന്റർനാഷണൽ എയർപോർട്ട്, ഡിഐഎഫ്‌സി (DIFC), ഇബ്‌ന് ബത്തൂത്ത മാൾ, ദുബായ് മാൾ, മോൾ ഓഫ് ദി എമിറേറ്റ്‌സ് തുടങ്ങി 8-ലധികം കേന്ദ്രങ്ങൾ പങ്കാളികളായി. സമാപനത്തോടനുബന്ധിച്ച് ദുബായ് മാളിൽ 42.195 കിലോമീറ്റർ ഫുൾ മാരത്തണും 21 കിലോമീറ്റർ ഹാഫ് മാരത്തണും സംഘടിപ്പിച്ചിരുന്നു. ദുബായ് സോഷ്യൽ അജണ്ട 33, ദുബായ് ക്വാളിറ്റി ഓഫ് ലൈഫ് സ്ട്രാറ്റജി 2033 എന്നിവയ്ക്ക് പിന്തുണ പ്രഖ്യാപിച്ചാണ് ഈ വലിയ കായിക സംരംഭം വിജയകരമായി പൂർത്തിയാക്കിയത്.
13