ഷെയ്ഖ് മൻസൂർ ബിൻ സായിദ് കാർഷിക മികവ് പുരസ്‌കാരത്തിന്റെ അഞ്ചാം പതിപ്പ് പ്രഖ്യാപിച്ചു

അബുദാബി : ഷെയ്ഖ് മൻസൂർ ബിൻ സായിദ് കാർഷിക മികവ് പുരസ്‌കാരത്തിന്റെ (Sheikh Mansour bin Zayed Agricultural Excellence Award) അഞ്ചാം പതിപ്പ് (2026–2027) അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി (ADAFSA) പ്രഖ്യാപിച്ചു. അബുദാബിയിൽ നടന്ന വാർത്താസമ്മേളനത്തിൽ അവാർഡ് സുപ്രീം കമ്മിറ്റി ചെയർപേഴ്‌സൺ മൂസ സുഹൈൽ അൽ മുഹൈരിയും മറ്റ് പ്രമുഖ ഉദ്യോഗസ്ഥരും പങ്കെടുത്തു. കാർഷിക, ഭക്ഷ്യസുരക്ഷാ മേഖലകളിലെ നൂതന ആശയങ്ങളെ പ്രോത്സാഹിപ്പിക്കുകയാണ് പുരസ്‌കാരത്തിലൂടെ ലക്ഷ്യമിടുന്നത്.
13 പ്രധാന വിഭാഗങ്ങളിലായി ഏകദേശം 10 ദശലക്ഷം ദിർഹമാണ് സമ്മാനത്തുകയായി വിജയികൾക്ക് വിതരണം ചെയ്യുന്നത്. ‘ബെസ്റ്റ് സപ്പോർട്ടിംഗ് മാർക്കറ്റിംഗ് ഔട്ട്‌ലെറ്റ്’, ‘അഗ്രികൾച്ചറൽ ഇംപാക്ട് മേക്കർ’ എന്നീ രണ്ട് പുതിയ അവാർഡ് വിഭാഗങ്ങൾ ഇത്തവണ പുതുതായി ഉൾപ്പെടുത്തിയിട്ടുണ്ട്. കൂടാതെ അൽ വത്ബയിലെ ഷെയ്ഖ് സായിദ് ഫെസ്റ്റിവലിന്റെ ഭാഗമായി സംഘടിപ്പിക്കുന്ന അനുബന്ധ മത്സരങ്ങളുടെ എണ്ണം 97 ആയി ഉയർത്തി. കർഷകരുടെയും നാടൻ ഉൽപ്പന്നങ്ങളുടെയും വിപണനത്തിനും പ്രോത്സാഹനത്തിനുമായി 5 വലിയ ഫെസ്റ്റിവലുകളും ഇതിന്റെ ഭാഗമായി നടക്കും.