‘സൈബർ ജനീവ കൺവെൻഷൻ’ വേണമെന്ന് യുഎഇ

അബുദാബി: ഡിജിറ്റൽ അടിസ്ഥാന സൗകര്യങ്ങൾക്ക് നേരെ നടക്കുന്ന വൻകിട സൈബർ ആക്രമണങ്ങളെ യുദ്ധപ്രവർത്തനമായി (Act of war) പരിഗണിക്കുന്നതിന് ആഗോളതലത്തിൽ ‘സൈബർ ജനീവ കൺവെൻഷൻ’ രൂപീകരിക്കണമെന്ന് യുഎഇ. അബുദാബിയിൽ നടക്കുന്ന ഹിലി ഫോറത്തിൽ സംസാരിക്കവെ യുഎഇ സൈബർ സെക്യൂരിറ്റി കൗൺസിൽ മേധാവി ഡോ. മുഹമ്മദ് അൽ കുവൈത്തിയാണ് ഈ നിർദ്ദേശം മുന്നോട്ടുവെച്ചത്. ആർട്ടിഫിഷ്യൽ ഇന്റലിജൻസ് അധിഷ്ഠിത ഭീഷണികൾ വർദ്ധിച്ചുവരുന്ന സാഹചര്യത്തിൽ രാജ്യങ്ങളുടെ ഡിജിറ്റൽ ആസ്തികൾ സംരക്ഷിക്കാൻ അന്താരാഷ്ട്ര നിയമങ്ങളും നിർവ്വചനങ്ങളും അത്യാവശ്യമാണെന്ന് അദ്ദേഹം ചൂണ്ടിക്കാട്ടി.
അടുത്തിടെ രാജ്യത്തിന് നേരെ ഉണ്ടായ മിസൈൽ-ഡ്രോൺ ആക്രമണങ്ങൾക്ക് പുറമെ സൈബർ ഭീഷണികളും വർദ്ധിച്ചുവരുന്ന പശ്ചാത്തലത്തിലാണ് ഈ നീക്കം. ലോക്ഹീഡ് മാർട്ടിൻ, ജി42 (G42) തുടങ്ങിയ സ്ഥാപനങ്ങളിലെ പ്രമുഖർ പങ്കെടുത്ത ചർച്ചയിൽ, സൈബർ-വ്യോമ പ്രതിരോധ സംവിധാനങ്ങൾ സംയോജിപ്പിച്ച് പ്രവർത്തിക്കേണ്ടതിന്റെ പ്രാധാന്യം വിദഗ്ദ്ധർ ചൂണ്ടിക്കാട്ടി. എഐ അധിഷ്ഠിത സൈനിക പ്രതിരോധങ്ങളിൽ അന്തിമ തീരുമാനങ്ങൾ കൈക്കൊള്ളാൻ മനുഷ്യന്റെ ഇടപെടൽ (Human in the loop) അത്യാവശ്യമാണെന്നും യോഗം വിലയിരുത്തി.