ഷെയ്ഖ് മുഹമ്മദിന്റെ പുതിയ പുസ്തകം ‘ദ ലെറ്റേഴ്‌സ്’ പ്രകാശനം ചെയ്തു

ദുബായ്: പൊതുസേവന രംഗത്തെ ആറ് പതിറ്റാണ്ടിന്റെ അനുഭവ സമ്പത്തിൽ നിന്ന് ഉൾക്കൊണ്ട കാഴ്ചപ്പാടുകളുമായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ പുതിയ പുസ്തകം പ്രകാശനം ചെയ്തു. ‘ലൈഫ് ടോട്ട് മി’ (Life Taught Me) പരമ്പരയുടെ രണ്ടാം ഭാഗമായി പുറത്തിറക്കിയ ‘ലെറ്റേഴ്‌സ്’ (Letters) എന്ന പുസ്തകത്തെക്കുറിച്ചുള്ള വിവരങ്ങൾ എക്‌സിലൂടെയാണ് (X) അദ്ദേഹം പങ്കുവെച്ചത്. വരുംതലമുറകൾക്കായി ആശയങ്ങളും അനുഭവങ്ങളും കരുതിവെക്കുക എന്ന ലക്ഷ്യത്തോടെയാണ് പുസ്തകം രചിച്ചിരിക്കുന്നത്.
തന്റെ സഹോദരങ്ങൾ, മക്കൾ, പേരക്കുട്ടികൾ, ഒപ്പമുള്ള ടീം അംഗങ്ങൾ, രാജ്യത്തെ ജനങ്ങൾ എന്നിവർക്കായി തയ്യാറാക്കിയ കത്തുകളാണ് ഈ സമാഹാരത്തിലുള്ളത്. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന് അയച്ച ആദ്യ സന്ദേശത്തോടെയാണ് പുസ്തകം ആരംഭിക്കുന്നത്. ജീവിതം ക്ഷണികമാണെങ്കിലും ആശയങ്ങൾ നിലനിൽക്കുമെന്നും, ഉത്തരവാദിത്തങ്ങൾ ഏറ്റെടുക്കുന്ന വരുംതലമുറയുടെ വഴിയിൽ വഴികാട്ടിയാകാനാണ് ഈ കത്തുകൾ സമാഹരിച്ചതെന്നും ഷെയ്ഖ് മുഹമ്മദ് കുറിപ്പിൽ വ്യക്തമാക്കി.