ദുബായ് : ഭാവിയിൽ ആഗോളതലത്തിലും ഗൾഫ് മേഖലയിലും കൂടുതൽ വൈദ്യുതോർജ്ജം ആവശ്യമായി വരുമെന്നും, ഊർജ്ജ വിതരണ പ്രക്രിയയിലെ ചോർച്ചയും നഷ്ടവും കുറയ്ക്കുന്നതിന് ശക്തമായ നടപടികൾ അനിവാര്യമാണെന്നും യുഎഇ ഊർജ്ജ, അടിസ്ഥാന സൗകര്യ വികസന മന്ത്രി സുഹൈൽ അൽ മസ്രൂയി. ദുബായിൽ നടന്ന മിഡിൽ ഈസ്റ്റ് എനർജി സമ്മേളനത്തിന്റെ ഉദ്ഘാടന പ്രസംഗത്തിലാണ് അദ്ദേഹം ഇക്കാര്യം വ്യക്തമാക്കിയത്. മുൻ പതിറ്റാണ്ടുകളിലെ ഊർജ്ജക്ഷമതാ രീതികൾ ഇനി പ്രായോഗികമല്ലെന്നും, മേഖലയിലെ നിലവിലെ രാഷ്ട്രീയ സാഹചര്യങ്ങൾ കണക്കിലെടുത്ത് പുനരുപയോഗ ഊർജ്ജ സ്രോതസ്സുകളിലേക്ക് മാറേണ്ടത് അത്യാവശ്യമാണെന്നും അദ്ദേഹം കൂട്ടിച്ചേർത്തു.
വൈവിധ്യമാർന്ന സ്രോതസ്സുകളിൽ നിന്ന് ശുദ്ധമായ ഊർജ്ജം ഉത്പാദിപ്പിക്കുന്നതിന്റെ ഭാഗമായി 2030-2031 വർഷത്തോടെ രാജ്യത്തെ മൊത്തം ഊർജ്ജ ഉത്പാദനത്തിന്റെ 35 ശതമാനവും ക്ലീൻ എനർജിയാക്കി മാറ്റാൻ ലക്ഷ്യമിടുന്നതായി മന്ത്രി പ്രഖ്യാപിച്ചു. സൗരോർജ്ജ ഉത്പാദനത്തിൽ യുഎഇ ലോകത്തിന് മാതൃകയാണെന്നും, 5 ജിഗാവാട്ട് ശേഷിയും 19.5 ജിഗാവാട്ട് ബാറ്ററി സംഭരണശേഷിയുമുള്ള അൽ ദഫ്ര സോളാർ പിവി പ്ലാന്റ് വഴി തടസ്സമില്ലാതെ മുഴുവൻ സമയവും വൈദ്യുതി ലഭ്യമാക്കാൻ രാജ്യത്തിന് സാധിക്കുന്നുണ്ടെന്നും മന്ത്രി ചൂണ്ടിക്കാട്ടി.