ലോക മാരത്തണുകളിൽ യുഎഇ പതാക ഉയർത്തി സാലം അൽ ഹാഷ്മി

അബുദാബി : ലോകത്തിലെ ഏറ്റവും പ്രശസ്തമായ മാരത്തണുകൾ പൂർത്തിയാക്കി യുഎഇയുടെ അഭിമാനമായി മാറിയിരിക്കുകയാണ് 34-കാരനായ സാലം അൽ ഹാഷ്മി. സിവിൽ എഞ്ചിനീയറും അഞ്ച് കുട്ടികളുടെ പിതാവുമായ ഈ അബുദാബി സ്വദേശി, ജോലി തിരക്കുകൾക്കിടയിലും ആഴ്ചയിൽ 100 കിലോമീറ്ററോളം ഓടിയാണ് പരിശീലനം നടത്തുന്നത്. പ്രശസ്തമായ ആബട്ട് വേൾഡ് മാരത്തൺ മേജർസ് സീരീസിലെ എട്ട് പ്രധാന മാരത്തണുകളും പൂർത്തിയാക്കിയ അപൂർവ്വം കായികതാരങ്ങളിൽ ഒരാളാണ് ഇദ്ദേഹം.
2020-ൽ യാസ് ഐലൻഡിൽ നടന്ന 10 കി.മീ മത്സരത്തിലൂടെ ഓട്ടരംഗത്തേക്ക് വന്ന സാലം, ന്യൂയോർക്ക്, ബോസ്റ്റൺ, ബാഴ്‌സലോണ തുടങ്ങിയ അന്താരാഷ്ട്ര മാരത്തണുകളിൽ യുഎഇ പതാകയേന്തി ശ്രദ്ധേയനായി. നിശ്ചയദാർഢ്യത്തോടെയും സ്വന്തം ചെലവിലും കായികരംഗത്ത് മുന്നേറുന്ന സാലമിന്റെ ഈ അപൂർവ്വ നേട്ടത്തെ അബുദാബി സ്‌പോർട്‌സ് കൗൺസിൽ ചെയർമാൻ ഷെയ്ഖ് നഹ്‌യാൻ ബിൻ സായിദ് അൽ നഹ്‌യാൻ നേരിട്ട് ആദരിച്ചിരുന്നു.