ശമ്പളദിനങ്ങളിൽ ഓൺലൈൻ തട്ടിപ്പ് വർദ്ധിക്കുന്നു; ജാഗ്രത പാലിക്കാൻ അബുദാബി പോലീസ്

അബുദാബി : ശമ്പളം ലഭിക്കുന്ന ദിവസങ്ങൾ ലക്ഷ്യമിട്ട് രാജ്യത്ത് ഓൺലൈൻ, സാമ്പത്തിക തട്ടിപ്പുകൾ വർദ്ധിച്ചുവരുന്നതായി അബുദാബി പോലീസിന്റെ മുന്നറിയിപ്പ്. വ്യാജ ഓഫറുകളും ലിങ്കുകളും നൽകി പണവും വ്യക്തിഗത വിവരങ്ങളും കവരുന്ന സംഘങ്ങൾക്കെതിരെ ജാഗ്രത പാലിക്കണമെന്ന് അധികൃതർ ആവശ്യപ്പെട്ടു. ഔദ്യോഗികവും വിശ്വസനീയവുമായ സ്ഥാപനങ്ങളുമായി മാത്രം ഇടപാടുകൾ നടത്താനും വാഗ്ദാനങ്ങളിൽ വീഴരുതെന്നും പോലീസ് വ്യക്തമാക്കുന്നു.
വ്യാജ വസ്തു പരസ്യങ്ങൾ, വിസ സേവനങ്ങൾ, ജോലി വാഗ്ദാനങ്ങൾ, സെക്കൻഡ് ഹാൻഡ് വാഹനങ്ങൾ, ആഡംബര വാച്ചുകൾ എന്നിവ കുറഞ്ഞ വിലയിൽ നൽകാമെന്ന് പറഞ്ഞാണ് തട്ടിപ്പുകാർ ആളുകളെ സമീപിക്കുന്നത്. ബാങ്ക് വിവരങ്ങൾ, പാസ്‌വേഡ്, ഒടിപി (OTP) എന്നിവ ആരോടും പങ്കുവെക്കരുതെന്നും മുൻകൂറായി പണം നൽകരുതെന്നും പോലീസ് ഓർമ്മിപ്പിച്ചു. തട്ടിപ്പുകൾ ശ്രദ്ധയിൽപ്പെട്ടാൽ 8002626 എന്ന നമ്പറിലോ, 2828 ലേക്ക് എസ്എംഎസ് അയച്ചോ, aman@adpolice.gov.ae എന്ന ഇമെയിൽ വഴിയോ ‘അമാൻ’ (Aman) സേവനത്തിൽ റിപ്പോർട്ട് ചെയ്യാം.