ഇത്തിഹാദ് റെയിൽ പുതിയ സ്റ്റേഷനുകളും ടിക്കറ്റ് നിരക്കുകളും പ്രഖ്യാപിച്ചു

അബുദാബി : യു.എ.ഇയിലെ ആദ്യ ദേശീയ പാസഞ്ചർ ട്രെയിൻ ശൃംഖലയായ ഇത്തിഹാദ് റെയിലിന്റെ അടുത്ത ഘട്ട വികസന തിയ്യതികളും വിവരങ്ങളും പുറത്തുവിട്ടു. അബുദാബിക്കും ഫുജൈറയ്ക്കും ഇടയിലുള്ള ആദ്യഘട്ട സർവീസ് വിജയകരമായി തുടരുന്നതിനിടെ, 2026 സെപ്റ്റംബർ 30-ന് ദുബായ് (ജുമൈറ ഗോൾഫ് എസ്റ്റേറ്റ്സ്), ഷാർജയിലെ അൽ ദൈദ് എന്നീ പുതിയ സ്റ്റേഷനുകൾ പ്രവർത്തനസജ്ജമാകും. തുടർന്ന് നവംബർ 30-ന് മദീനത്ത് സായിദ്, ലിവ സ്റ്റേഷനുകളും ഡിസംബർ 30-ന് അൽ സില, അൽ ദന്ന, അൽ മിർഫ സ്റ്റേഷനുകളും തുറക്കും. 2027 മാർച്ച് 30-ന് ഷാർജ യൂണിവേഴ്സിറ്റി സിറ്റി സ്റ്റേഷൻ കൂടി തുറക്കുന്നതോടെ പാസഞ്ചർ നെറ്റ്‌വർക്കിന്റെ ആദ്യഘട്ടം പൂർത്തിയാകും.
നിലവിൽ അബുദാബി-ഫുജൈറ റൂട്ടിൽ 50 ശതമാനം തുടക്കകാല ഇളവോടെ കംഫർട്ട് ക്ലാസിന് 55 ദിർഹം മുതലും പ്രീമിയം ക്ലാസിന് 120 ദിർഹം മുതലുമാണ് ടിക്കറ്റ് നിരക്കുകൾ. സ്വർണ്ണ മണൽത്തരികൾ നിറഞ്ഞ മരുഭൂമിയിലൂടെയും ഹാജർ മലനിരകളിലൂടെയും കടന്നുപോകുന്ന ഫുജൈറ റൂട്ടാണ് യാത്രക്കാരിൽ പ്രധാന ആകർഷണം. ദുബായിൽ നോൾ (Nol) കാർഡ് ഉപയോഗിച്ച് യാത്ര ചെയ്യാനുള്ള സൗകര്യവും പ്രധാന സ്റ്റേഷനുകളിൽ നിന്ന് കണക്റ്റിവിറ്റി ബസ് സർവീസുകളും ഇത്തിഹാദ് റെയിൽ ഉറപ്പാക്കുന്നുണ്ട്.