യുഎഇയിൽ മൂടൽമഞ്ഞിനും മഴയ്ക്കും സാധ്യതയെന്ന് കാലാവസ്ഥാ നിരീക്ഷണ കേന്ദ്രം

ദുബായ് : യുഎഇയിൽ വരും ദിവസങ്ങളിൽ ചൂടിന് ആശ്വാസമായി താപനില കുറയുമെന്ന് ദേശീയ കാലാവസ്ഥാ നിരീക്ഷണ കേന്ദ്രം (എൻസിഎം) അറിയിച്ചു. ഈർപ്പമുള്ള അന്തരീക്ഷം തുടരുന്നതിനാൽ രാത്രിയിലും പുലർച്ചെയും മൂടൽമഞ്ഞിന് സാധ്യതയുണ്ട്. കിഴക്കൻ മേഖലകളിൽ മേഘാവൃതമായ അന്തരീക്ഷമായിരിക്കും. തീരദേശങ്ങളിലും ദ്വീപുകളിലും താപനില 39°C മുതൽ 45°C വരെയും ഉൾനാടുകളിൽ 44°C മുതൽ 47°C വരെയും പർവതമേഖലകളിൽ 33°C മുതൽ 38°C വരെയും രേഖപ്പെടുത്താൻ സാധ്യതയുണ്ട്. മണിക്കൂറിൽ 10 മുതൽ 30 കിലോമീറ്റർ വരെ വേഗതയിൽ കാറ്റടിക്കാൻ സാധ്യതയുണ്ടെങ്കിലും അറബിക്കടലിലും ഒമാൻ കടലിലും കടൽ ശാന്തമായിരിക്കും. തിങ്കളാഴ്ച മുതൽ അന്തരീക്ഷത്തിൽ കൂടുതൽ മാറ്റങ്ങളുണ്ടാകുമെന്നും കിഴക്കൻ, തെക്കൻ മേഖലകളിൽ ഉച്ചയ്ക്ക് ശേഷം മഴയ്ക്ക് സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി. കാറ്റിന്റെ വേഗത മണിക്കൂറിൽ 40 കിലോമീറ്റർ വരെ ഉയരാൻ സാധ്യതയുള്ളതിനാൽ പൊടിപടലങ്ങൾ ഉയർന്നേക്കാം.