നമുക്ക് ഒന്നിച്ച് മുന്നേറാം; ‘യൂണിയൻ പ്ലെഡ്ജ് ഡേ’ ആശംസകളുമായി ഷെയ്ഖ് മുഹമ്മദ്

അബുദാബി : യുഎഇയുടെ ചരിത്രത്തിലെ സുവർണ്ണ അധ്യായമായ ‘യൂണിയൻ പ്ലെഡ്ജ് ഡേ’യിൽ (യൂണിയൻ കരാർ ദിനം) രാജ്യത്തിന്റെ ഐക്യ മൂല്യങ്ങളെ പ്രകീർത്തിച്ച് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ. 55 വർഷം മുൻപ് ഇതേദിവസമാണ് രാഷ്ട്രപിതാവ് ഷെയ്ഖ് സായിദിന്റെയും മറ്റ് ഭരണാധികാരികളുടെയും നേതൃത്വത്തിൽ യുഎഇ ഭരണഘടനയിലും യൂണിയൻ പ്രഖ്യാപനത്തിലും ഒപ്പുവെച്ച് ‘യുണൈറ്റഡ് അറബ് എമിറേറ്റ്സ്’ എന്ന പേര് രാജ്യത്തിന് നൽകിയത്.
“യൂണിയൻ പ്ലെഡ്ജ് ദിനത്തിൽ, അന്തരിച്ച ഷെയ്ഖ് സായിദും മറ്റ് ഭരണാധികാരികളും ചേർന്ന് സ്ഥാപിച്ച ഐക്യത്തിന്റെ തത്വങ്ങളോടുള്ള ഞങ്ങളുടെ പ്രതിബദ്ധത ഞങ്ങൾ വീണ്ടും പുതുക്കുകയാണ്,” പ്രസിഡന്റ് തന്റെ എക്സ് (X) അക്കൗണ്ടിൽ കുറിച്ചു. 1971 ഡിസംബർ 2-ലെ ചരിത്രപ്രധാനമായ യൂണിയൻ രൂപീകരണത്തിന് അടിത്തറയിട്ടത് ഈ ദിനമായിരുന്നു. ഡിസംബർ 2-ലെ ദേശീയ ദിനം (ഈദ് അൽ ഇത്തിഹാദ്), നവംബർ 3-ലെ ഫ്ലാഗ് ഡേ എന്നിവ പോലെ രാജ്യത്തിന്റെ ചരിത്രയാത്രയെ ഓർമ്മിപ്പിക്കുന്ന ഒരു പ്രധാന ദേശീയ ദിനമായിട്ടാണ് ജൂലൈ 18-നെ യുഎഇ കാണുന്നത്.