ട്രാഫിക് ബ്ലോക്കിൽ കിടന്ന് മടുത്തവർക്ക് ദുബായ് ആർടിഎയുടെ വക ഒരു ‘മാസ്സ്’ മറുപടി

ദുബൈ : നഗരത്തിലെ ഗതാഗതക്കുരുക്ക് അഴിക്കുന്നതിനും പ്രധാന റോഡുകളെ തമ്മിൽ ബന്ധിപ്പിക്കുന്നതിനുമായി വൻ റോഡ് വികസന പദ്ധതികളുമായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). 200 കോടി ദിർഹം ചെലവിൽ നിർമ്മിക്കുന്ന 12 കിലോമീറ്റർ നീളമുള്ള ലത്തീഫ ബിൻത് ഹംദാൻ കോറിഡോർ ഇതിൽ പ്രധാനപ്പെട്ട ഒന്നാണ്. 2028-ൽ പൂർത്തിയാകുന്ന ഈ പദ്ധതി വഴി ഉമ്മു അൽ ഷീഫ് സ്ട്രീറ്റിൽ നിന്ന് എമിറേറ്റ്സ് റോഡിലേക്കുള്ള യാത്രാസമയം 33 മിനിറ്റിൽ നിന്ന് വെറും 15 മിനിറ്റായി കുറയും. കൂടാതെ ഹെസ്സ സ്ട്രീറ്റ് വികസനത്തിന്റെ രണ്ടാം ഘട്ടത്തിലൂടെ അൽ ഖൈൽ റോഡിനും മുഹമ്മദ് ബിൻ സായിദ് റോഡിനുമിടയിലെ യാത്രാസമയം 24 മിനിറ്റിൽ നിന്ന് 5 മിനിറ്റായി ചുരുങ്ങും. നിലവിൽ ദുബായ് ഹാർബറിലേക്കുള്ള നേരിട്ടുള്ള പാലത്തിന്റെ 90 ശതമാനവും, അൽ ഖലീജ് സ്ട്രീറ്റ് ടണലിന്റെ 80 ശതമാനവും നിർമ്മാണം പൂർത്തിയായിട്ടുണ്ട്. തിരക്കേറിയ വേൾഡ് ട്രേഡ് സെന്റർ റൗണ്ട്എബൗട്ട് മാറ്റി പകരം സിഗ്നൽ സംവിധാനം സ്ഥാപിക്കുന്ന ജോലികളും 60 ശതമാനത്തിലധികം പൂർത്തിയായിക്കഴിഞ്ഞു. ഈ മേഖലയിലെ കാത്തിരിപ്പ് സമയം 12 മിനിറ്റിൽ നിന്ന് 90 സെക്കൻഡായി കുറയ്ക്കാൻ പുതിയ മാറ്റം സഹായിക്കുമെന്നും ഒക്ടോബറോടെ കൂടുതൽ പുതിയ പാലങ്ങൾ തുറക്കുമെന്നും ആർടിഎ വ്യക്തമാക്കി.