അബുദാബി : പ്രധാന റോഡുകളിൽ ട്രാഫിക് നിയമങ്ങൾ പാലിക്കാതെ ഇ-സ്കൂട്ടർ ഓടിക്കുന്നതുമൂലം ഉണ്ടാകുന്ന കടുത്ത അപകടങ്ങളെക്കുറിച്ച് മുന്നറിയിപ്പുമായി അബുദാബി പോലീസ്. ഇ-സ്കൂട്ടർ യാത്രികർ പ്രധാന റോഡുകൾ അലക്ഷ്യമായി മുറിച്ചുകടക്കുന്നതും വാഹനങ്ങൾ വരുന്നതിന് എതിർദിശയിൽ ഓടിക്കുന്നതും ഒടുവിൽ കാറിലിടിച്ച് തെറിച്ചുവീഴുന്നതുമായ നിരവധി യഥാർത്ഥ അപകട ദൃശ്യങ്ങൾ ഉൾപ്പെടുത്തിയ വീഡിയോ പങ്കുവെച്ചാണ് പോലീസ് ജാഗ്രതാ നിർദ്ദേശം നൽകിയത്.
ഇ-സ്കൂട്ടറുകൾ മോട്ടോർ വാഹനങ്ങൾ സഞ്ചരിക്കുന്ന പ്രധാന റോഡുകളിലോ ജനത്തിരക്കുള്ള സ്ഥലങ്ങളിലോ ഓടിക്കരുതെന്നും, അതിനായി നിശ്ചയിച്ചിട്ടുള്ള പ്രത്യേക ട്രാക്കുകളിൽ മാത്രം ഉപയോഗിക്കണമെന്നും ട്രാഫിക് ആൻഡ് പട്രോൾസ് ഡയറക്ടറേറ്റ് ഓർമ്മിപ്പിച്ചു. യാത്രക്കാർ നിർബന്ധമായും ഹെൽമറ്റ്, എൽബോ-ക്ലീ പ്രൊട്ടക്ടറുകൾ തുടങ്ങിയ സുരക്ഷാ ഉപകരണങ്ങൾ ധരിക്കണം. കുട്ടികൾ ഇ-സ്കൂട്ടർ ഉപയോഗിക്കുമ്പോൾ മാതാപിതാക്കൾ കൂടുതൽ ശ്രദ്ധ പുലർത്തണമെന്നും റോഡ് സുരക്ഷാ ശീലങ്ങൾ അവരെ പഠിപ്പിക്കണമെന്നും പോലീസ് ആവശ്യപ്പെട്ടു. ട്രാഫിക് നിയമങ്ങൾ കൃത്യമായി പാലിച്ചുകൊണ്ട് സുരക്ഷിതമായ ഒരു റോഡ് സംസ്കാരം വളർത്തിയെടുക്കാൻ പൊതുജനങ്ങൾ സഹകരിക്കണമെന്നും അധികൃതർ കൂട്ടിച്ചേർത്തു.