ദുബായ് : എലൈറ്റ് ഗ്രൂപ്പ് ഹോൾഡിംഗിന്റെ സബ്സിഡിയറിയായ ‘ആർട്ട് എലൈറ്റ്’ (ART Elite) യുഎഇയിലെ തങ്ങളുടെ ബിസിനസ്സ് വിപുലീകരണത്തിന്റെ ഭാഗമായി മുന്നൂറിലധികം പുതിയ ‘ജെറ്റൂർ’ (Jetour) വാഹനങ്ങൾ കൂടി നിരത്തിലിറക്കി. ഇതോടൊപ്പം ഉപഭോക്താക്കൾക്കായി ‘ലീസ്-ടു-ഓൺ’ (Lease-to-Own), ‘കോർപ്പറേറ്റ് ലീസിങ്’ (Corporate Leasing) എന്നീ രണ്ട് പുതിയ പദ്ധതികളും കമ്പനി പ്രഖ്യാപിച്ചു. ദുബായ് അൽ കൂസിലെ ജെറ്റൂർ ഷോറൂമിൽ നടന്ന ചടങ്ങിലാണ് പുതിയ പദ്ധതികളുടെ ഔദ്യോഗിക പ്രഖ്യാപനം നടന്നത്. ജെറ്റൂറിന്റെ പ്രശസ്ത മോഡലുകളായ G700, T2, T1, ഡാഷിങ്, X70 പ്ലസ് എന്നിവയെല്ലാം ഇനി ആർട്ട് എലൈറ്റിലൂടെ ലഭ്യമാകും.
വാഹനം സ്വന്തമാക്കാൻ ആഗ്രഹിക്കുന്നവർക്ക് വലിയ തുക ഒന്നിച്ച് മുടക്കാതെ 12 മുതൽ 48 മാസം വരെയുള്ള നിശ്ചിത പ്രതിമാസ തവണകളിലൂടെ ഉടമസ്ഥാവകാശം നേടാൻ സഹായിക്കുന്നതാണ് ലീസ്-ടു-ഓൺ പദ്ധതി. ഇൻഷുറൻസ്, മെയിന്റനൻസ്, രജിസ്ട്രേഷൻ, റോഡ് സൈഡ് അസിസ്റ്റൻസ് എന്നിവയെല്ലാം കമ്പനി തന്നെ നോക്കിക്കൊള്ളും. ബിസിനസ്സ് സ്ഥാപനങ്ങൾക്കായി ഡൗൺ പേയ്‌മെന്റ് ഇല്ലാതെ വാഹനങ്ങൾ ലീസിനെടുക്കാൻ സാധിക്കുന്നതാണ് കോർപ്പറേറ്റ് ലീസിങ് പദ്ധതി.