ദുബായ് : ഫെബ്രുവരി 28-ന് ആരംഭിച്ച യുദ്ധത്തെ തുടർന്ന് മാസങ്ങളായി നിർത്തിവെച്ചിരുന്ന യുഎഇ – ഇറാൻ വിമാന സർവീസുകൾ ഭാഗികമായി പുനരാരംഭിച്ചു. തിങ്കളാഴ്ച ഇറാനിയൻ എയർലൈനായ ഫ്ലൈസെപെഹ്റാൻ (Flysepehran) ടെഹ്റാനിലെ ഇമാം ഖൊമേനി അന്താരാഷ്ട്ര വിമാനത്താവളത്തിൽ നിന്ന് ദുബായ് അന്താരാഷ്ട്ര വിമാനത്താവളത്തിലേക്ക് (DXB) വിജയകരമായി ആദ്യ സർവീസ് നടത്തി. ഉച്ചയ്ക്ക് 1:18-നാണ് വിമാനം ദുബായിലിറങ്ങിയത്. ജൂലൈ 1 മുതൽ ഇരുരാജ്യങ്ങളിലെയും സിവിൽ ഏവിയേഷൻ അതോറിറ്റികളുടെ അനുമതിയോടെ കൂടുതൽ സർവീസുകൾ പൂർണ്ണതോതിൽ പുനരാരംഭിക്കുമെന്നാണ് വിവരം.
യുഎസും ഇറാനും തമ്മിൽ ജൂൺ പകുതിയോടെ ഒപ്പുവെച്ച താൽക്കാലിക വെടിനിർത്തൽ കരാറിന് പിന്നാലെയാണ് വ്യോമഗതാഗതം സാധാരണ നിലയിലാക്കാനുള്ള നടപടികൾ ആരംഭിച്ചത്. നിലവിൽ ഫ്ലൈസെപെഹ്റാൻ തിങ്കൾ, ബുധൻ ദിവസങ്ങളിലും വാരാഷ് എയർലൈൻസ് ചൊവ്വാഴ്ചയും സർവീസ് നടത്തും. ഫ്ലൈദുബായ്, എയർ അറേബ്യ തുടങ്ങിയ യുഎഇ വിമാന കമ്പനികൾ നിലവിൽ ഈ റൂട്ടിൽ സർവീസുകൾ പുനരാരംഭിച്ചിട്ടില്ല.