ദുബായ് : പസഫിക് സമുദ്രത്തിൽ രൂപംകൊള്ളുന്ന ‘എൽ നിന്യോ’ (El Niño) പ്രതിഭാസം കാരണം വരും മാസങ്ങളിൽ യുഎഇയിൽ കടുത്ത ചൂടിനും ഉയർന്ന അന്തരീക്ഷ ഈർപ്പത്തിനും (Humidity) സാധ്യതയെന്ന് ദേശീയ കാലാവസ്ഥാ കേന്ദ്രം (NCM). 2026 ജൂലൈ മുതൽ നവംബർ വരെയുള്ള മാസങ്ങളിൽ രാജ്യത്ത് എൽ നിന്യോ പ്രഭാവമുണ്ടാകാൻ 98 ശതമാനം സാധ്യതയുണ്ടെന്നാണ് മുന്നറിയിപ്പ്.
ആഗോള കാലാവസ്ഥാ വ്യതിയാനങ്ങൾക്ക് കാരണമാകുന്ന ഈ പ്രതിഭാസം മൂലം വർഷത്തിന്റെ രണ്ടാം പകുതിയിൽ യുഎഇയിൽ സാധാരണയേക്കാൾ കൂടുതൽ ചൂടും ചിലയിടങ്ങളിൽ പെട്ടെന്നുള്ള ശക്തമായ ഇടിയോടുകൂടിയ മഴയും ഉണ്ടായേക്കാം. ശരത്കാലത്ത് (Autumn) അറബിക്കടലിൽ ചുഴലിക്കാറ്റുകൾ രൂപപ്പെടാനുള്ള സാധ്യതയും ഇത് വർദ്ധിപ്പിക്കുന്നുണ്ട്. 2027-ഓടെ ഇത് കൂടുതൽ ശക്തമായി ‘സൂപ്പർ എൽ നിന്യോ’ ആയി മാറാൻ സാധ്യതയുണ്ടെന്നും ആഗോള കാലാവസ്ഥാ നിരീക്ഷകർ വിലയിരുത്തുന്നു. ചൂടും ഈർപ്പവും കൂടുമെങ്കിലും രാജ്യം നേരിടാൻ പൂർണ്ണ സജ്ജമാണെന്ന് അധികൃതർ വ്യക്തമാക്കി.