ഹംബർഗ് : ഇന്റർനാഷണൽ ഫെഡറേഷൻ ഫോർ എമർജൻസി മെഡിസിനുമായി (IFEM) 10 വർഷത്തെ എക്സ്ക്ലൂസീവ് ആഗോള പങ്കാളിത്ത കരാറിൽ ഒപ്പുവെച്ച് യുഎഇയുടെ എമിറേറ്റ്സ് ക്ലാസിഫിക്കേഷൻ സൊസൈറ്റി (TASNEEF). ഹംബർഗിൽ നടന്ന അന്താരാഷ്ട്ര എമർജൻസി മെഡിസിൻ കോൺഫറൻസിലാണ് ഇരുപക്ഷവും കരാർ ഒപ്പിട്ടത്. ഇതോടെ ഐഎഫ്ഇഎമ്മിന്റെ എമർജൻസി ഡിപ്പാർട്ട്മെന്റ് സർട്ടിഫിക്കേഷൻ പ്രോഗ്രാമിന്റെ ഏക ആഗോള സർട്ടിഫിക്കേഷൻ പങ്കാളിയായി തസ്നീഫിന്റെ ബിസിനസ് അഷുറൻസ് വിഭാഗം മാറും.
ലോകമെമ്പാടുമുള്ള ആശുപത്രികളിലെ അത്യാഹിത വിഭാഗങ്ങളുടെ ഗുണനിലവാരം, രോഗീസുരക്ഷ, പ്രവർത്തനക്ഷമത എന്നിവ അന്താരാഷ്ട്ര മാനദണ്ഡങ്ങൾക്കനുസരിച്ച് വിലയിരുത്തുന്നതിനുള്ള ശക്തമായ സംവിധാനമാണ് ഈ പങ്കാളിത്തത്തിലൂടെ ഒരുങ്ങുന്നത്. യുഎഇയിൽ നിന്നുള്ള ഒരു പൊതു സർട്ടിഫിക്കേഷൻ ഏജൻസി അന്താരാഷ്ട്ര തലത്തിലേക്ക് വലിയ രീതിയിൽ വളരുന്നതിന്റെ സുപ്രധാന ചുവടുവെപ്പാണ് ഈ പത്തു വർഷത്തെ കരാറെന്ന് തസ്നീഫ് അധികൃതർ വ്യക്തമാക്കി.