ദുബായ് : എമിറേറ്റിലെ വിദ്യാഭ്യാസ മേഖലയ്ക്ക് കരുത്തുപകരുന്ന ‘ദുബായ് സ്കൂൾസ്’ (Dubai Schools) പദ്ധതിക്കായി 11 മില്യൺ ദിർഹത്തിന്റെ (ഏകദേശം 25 കോടിയിലധികം ഇന്ത്യൻ രൂപ) ധനസഹായം പ്രഖ്യാപിച്ച് പ്രമുഖ ധനകാര്യ സ്ഥാപനമായ ദുബായ് ഇസ്ലാമിക് ബാങ്ക് (DIB). നോളജ് ഫണ്ട് എസ്റ്റാബ്ലിഷ്‌മെന്റുമായുള്ള (KFE) പങ്കാളിത്തം പുതുക്കിക്കൊണ്ടാണ് 2026-2027 പുതിയ അധ്യയന വർഷത്തേക്കുള്ള ഈ വൻ തുക ബാങ്ക് കൈമാറിയത്. ഇത് തുടർച്ചയായ മൂന്നാം വർഷമാണ് ദുബായ് സ്കൂൾസ് പദ്ധതിക്ക് ഡിഐബി സാമ്പത്തിക പിന്തുണ നൽകുന്നത്.
സ്വദേശി വിദ്യാർത്ഥികൾക്ക് കുറഞ്ഞ ചെലവിൽ അന്താരാഷ്ട്ര നിലവാരമുള്ള അത്യാധുനിക വിദ്യാഭ്യാസം ഉറപ്പാക്കുകയാണ് ഈ പദ്ധതിയിലൂടെ ലക്ഷ്യമിടുന്നത്. യുഎഇയുടെ ദേശീയ അന്തസ്സ് ഉയർത്തിപ്പിടിക്കുന്നതിനൊപ്പം ഭാവിയിലെ തൊഴിൽ സാധ്യതകൾക്ക് അനുസൃതമായി പുതിയ തലമുറയെ വാർത്തെടുക്കാൻ ഈ സഹകരണം സഹായിക്കും. ദുബായ് സോഷ്യൽ അജണ്ട 33, ദുബായ് ഇക്കണോമിക് അജണ്ട (D33), എഡ്യൂക്കേഷൻ 33 സ്ട്രാറ്റജി എന്നിവയുടെ ലക്ഷ്യങ്ങൾ കൈവരിക്കുന്നതിലേക്ക് കൂടിയാണ് ഈ തുക വിനിയോഗിക്കുക. യുഎഇയിലെ ‘ഇയർ ഓഫ് ദി ഫാമിലി’ (Year of the Family) ആചരണ വേളയിൽ സ്വദേശി കുടുംബങ്ങളെ പിന്തുണയ്ക്കുന്നതിനായി പൊതു-സ്വകാര്യ പങ്കാളിത്തത്തോടെയുള്ള ഇത്തരം പ്രവർത്തനങ്ങൾ വലിയ പ്രാധാന്യമർഹിക്കുന്നതാണെന്ന് നോളജ് ഫണ്ട് എസ്റ്റാബ്ലിഷ്‌മെന്റ് സിഇഒ അബ്ദുള്ള മുഹമ്മദ് അൽ അവാറും ഡിഐബി ചീഫ് ഓപ്പറേറ്റിംഗ് ഓഫീസർ ഉബൈദ് അൽ ഷംസിയും വ്യക്തമാക്കി. കുട്ടികളുടെ വിദ്യാഭ്യാസത്തിനായി നടത്തുന്ന നിക്ഷേപം രാജ്യത്തിന്റെ സുസ്ഥിരമായ പുരോഗതിക്ക് അടിത്തറ പാകുമെന്നും അവർ കൂട്ടിച്ചേർത്തു.