ദുബായ് : ദുബായിലെ സാമൂഹിക മേഖല ശക്തിപ്പെടുത്തുന്നതിനും കൂടുതൽ സുസ്ഥിരമായ കമ്മ്യൂണിറ്റി വികസനം ഉറപ്പാക്കുന്നതിനുമായി പുതിയ നിയമം പുറപ്പെടുവിച്ച് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തും. ദുബായ് കമ്മ്യൂണിറ്റി ഡെവലപ്‌മെന്റ് അതോറിറ്റിയുടെ (CDA) പ്രവർത്തനങ്ങളെ സംബന്ധിച്ച ‘2026-ലെ 12-ാം നമ്പർ നിയമം’ ആണ് അദ്ദേഹം പ്രഖ്യാപിച്ചത്. ദുബായിലെ സാമൂഹിക സേവനങ്ങൾ മെച്ചപ്പെടുത്തുക, ദുർബല വിഭാഗങ്ങളുടെ സംരക്ഷണവും പുനരധിവാസവും ഉറപ്പാക്കുക, പൗരന്മാരുടെ സാമൂഹികവും സാമ്പത്തികവുമായ ശാക്തീകരണം സാധ്യമാക്കുക എന്നിവയാണ് പുതിയ നിയമത്തിന്റെ പ്രധാന ലക്ഷ്യങ്ങൾ. ഇതുകൂടാതെ, സമൂഹത്തിലെ വിവിധ വിഭാഗങ്ങൾ തമ്മിലുള്ള ഐക്യം വർദ്ധിപ്പിക്കാനും കമ്മ്യൂണിറ്റി പങ്കാളിത്തവും സാമൂഹിക ഉത്തരവാദിത്തവും പ്രോത്സാഹിപ്പിക്കാനും നിയമം ലക്ഷ്യമിടുന്നു.
പുതിയ നിയമപ്രകാരം സാമൂഹിക നയങ്ങളും തന്ത്രങ്ങളും രൂപീകരിക്കാനും ആവശ്യമായ നിയമനിർമ്മാണങ്ങൾ നിർദ്ദേശിക്കാനും അതോറിറ്റിക്ക് പൂർണ്ണ ചുമതലയുണ്ടായിരിക്കും. സാമൂഹിക സംഘടനകൾക്കും പ്രൊഫഷണലുകൾക്കും ലൈസൻസ് നൽകുന്നതും അതോറിറ്റിയുടെ മേൽനോട്ടത്തിലായിരിക്കും. സന്നദ്ധപ്രവർത്തനങ്ങൾ ഏകോപിപ്പിക്കുക, കുട്ടികളും ഭിന്നശേഷിക്കാരും ഉൾപ്പെടുന്ന ദുർബല വിഭാഗങ്ങൾക്കായി സംയോജിത സംരക്ഷണ സംവിധാനങ്ങൾ വികസിപ്പിക്കുക, കൂടുതൽ കമ്മ്യൂണിറ്റി സെന്ററുകൾ സ്ഥാപിക്കുക എന്നിവയും അതോറിറ്റിയുടെ പുതിയ ഉത്തരവാദിത്തങ്ങളിൽ ഉൾപ്പെടുന്നു.