യുഎഇ : ഭക്ഷണസാധനങ്ങൾ പാഴായിപ്പോകുന്നത് തടയാനും ഉപഭോക്താക്കൾക്ക് വൻ വിലക്കിഴിവിൽ ഭക്ഷണം ലഭ്യമാക്കാനുമായി പുതിയ മൊബൈൽ ആപ്പ് പുറത്തിറക്കി. ദുബായിൽ വളർന്ന ഹസൻ സർവർ, ഉമൈർ സർവർ എന്നീ സഹോദരങ്ങൾ ചേർന്ന് രൂപം നൽകിയ ‘പീക്കാബോക്സ്’ (Peekabox) എന്ന ആപ്പിലൂടെയാണ് റെസ്റ്റോറന്റുകൾ, കഫേകൾ, ബേക്കറികൾ, ഗ്രോസറികൾ എന്നിവടങ്ങളിൽ നിന്നുള്ള അധികഭക്ഷണം പകുതിയിലധികം വിലക്കുറവിൽ സ്വന്തമാക്കാൻ സാധിക്കുന്നത്. വിവിധ വ്യാപാരസ്ഥാപനങ്ങളിൽ അന്ന് രാവിലെ തയ്യാറാക്കിയതും എന്നാൽ വിറ്റുപോകാത്തതുമായ മികച്ച ഗുണനിലവാരമുള്ള ഭക്ഷണസാധനങ്ങളാണ് 50 മുതൽ 70 ശതമാനം വരെ വിലക്കിഴിവിൽ ഇതിലൂടെ വിൽപ്പന നടത്തുന്നത്.
ഉപഭോക്താക്കൾക്ക് ആപ്പ് വഴി തങ്ങളുടെ അടുത്തുള്ള കടകളിലെ ‘സർപ്രൈസ് ബോക്സുകൾ’ മുൻകൂട്ടി ബുക്ക് ചെയ്യാനും അന്ന് തന്നെ നേരിട്ടെത്തി അവ കൈപ്പറ്റാനും സാധിക്കും. ഗ്രോസറി സാധനങ്ങൾ അടങ്ങിയ ബോക്സുകൾക്ക് 15 ദിർഹവും ബേക്കറി, കോഫി ഷോപ്പ്, ഹോട്ടൽ ബുഫേകൾ തുടങ്ങിയ മറ്റ് വിഭാഗങ്ങളിലെ ബോക്സുകൾക്ക് 30 ദിർഹവുമാണ് ഈടാക്കുന്നത്. ഏതൊക്കെ ഭക്ഷണസാധനങ്ങളാണ് ബോക്സിൽ ഉള്ളതെന്ന് ഉപഭോക്താക്കൾക്ക് മുൻകൂട്ടി തിരഞ്ഞെടുക്കാൻ കഴിയില്ല എന്നതിനാലാണ് ഇതിന് ‘സർപ്രൈസ് ബോക്സ്’ എന്ന് പേരിട്ടിരിക്കുന്നത്. ആയിരത്തിലധികം പ്രമുഖ ബ്രാൻഡ് സ്റ്റോറുകളുമായി സഹകരിച്ചാണ് ഈ പുതിയ സംരംഭം യുഎഇയിൽ പ്രവർത്തനം ആരംഭിച്ചിരിക്കുന്നത്.