ദുബായ്: യുഎഇയിൽ താമസിക്കുന്നവർ എമിറേറ്റ്‌സ് ഐഡി എപ്പോഴും കൈവശം കരുതണമെന്നാണ് നിയമമെങ്കിലും, അഥവാ കാർഡ് നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ ഔദ്യോഗിക ആവശ്യങ്ങൾക്കായി ഇതിന്റെ ഡിജിറ്റൽ കോപ്പി മൊബൈൽ ഫോണിലൂടെ എളുപ്പത്തിൽ ലഭ്യമാക്കാം. ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) മാർഗ്ഗനിർദ്ദേശങ്ങൾ പ്രകാരം ഭൗതികമായ (Physical) കാർഡ് കൈവശമില്ലാത്ത അടിയന്തിര സാഹചര്യങ്ങളിൽ ഡിജിറ്റൽ ഐഡി നിയമപരമായ രേഖയായി ഉപയോഗിക്കാൻ സാധിക്കും. എമിറേറ്റ്‌സ് ഐഡി പുതുക്കാൻ നൽകി പുതിയ കാർഡിനായി കാത്തിരിക്കുന്നവർക്കും ഈ സംവിധാനം പ്രയോജനപ്പെടുത്താം.
രാജ്യത്തെ ഔദ്യോഗിക ഡിജിറ്റൽ ഐഡന്റിറ്റി ആപ്പായ ‘യുഎഇ പാസ്’ (UAE PASS) വഴിയോ അതോറിറ്റിയുടെ ‘യുഎഇ ഐസിപി’ (UAEICP) ആപ്പ് വഴിയോ ലോഗിൻ ചെയ്ത് എമിറേറ്റ്‌സ് ഐഡിയുടെ ഡിജിറ്റൽ കോപ്പി മിനിറ്റുകൾക്കകം ഫോണിൽ ഡൗൺലോഡ് ചെയ്യാം. ആവശ്യമെങ്കിൽ ഇതിന്റെ ക്യുആർ കോഡ് (QR Code) ജനറേറ്റ് ചെയ്യാനും ആപ്പിളും ആൻഡ്രോയിഡും ഉപയോഗിക്കുന്നവർക്ക് ഇത് തങ്ങളുടെ ഡിജിറ്റൽ വാലറ്റിലേക്ക് സൂക്ഷിച്ചുവെക്കാനും സാധിക്കും. എന്നാൽ ഒറിജിനൽ കാർഡ് നഷ്ടപ്പെടുകയോ മോഷണം പോകുകയോ ചെയ്താൽ ഏഴ് ദിവസത്തിനകം ഐസിപിയെ വിവരമറിയിച്ച് പുതിയ കാർഡിനായി അപേക്ഷിക്കേണ്ടത് നിർബന്ധമാണെന്ന് അധികൃതർ ഓർമ്മിപ്പിച്ചു.